“ქალბატონო კელი, სიმართლე მწარეა!” – ვატო შაქარიშვილი
ამერიკის ელჩს, კელი დეგნანს ქართველი დეპუტატის წერილზე არაადეკვატური პასუხის გაცემაში სდებს ბრალს თბილისის საკრებულოს ყოფილი წევრი ვატო შაქარაშვილი. შაქარაშვილი ამბობს, რომ დეგნანი მიმართვების იგნორირებაში ადრეც ყოფილა შემჩნეული.
„ქალბატონო კელი, ქართველებს გვაქვს ასეთი გამოთქმა – სიმართლე მწარეა! ამას მაშინ გამოვიყენებთ ხოლმე, როდესაც ნათქვამი სიმართლით ადრესატი უკმაყოფილო რჩება, ბრაზი ერევა და სახეს კარგავს…
საქართველოს პარლამენტის არჩეული დეპუტატის წერილზე, ასეთი არაადეკვატური რეაქციით თქვენ, არათუ პასუხი გაეცით საზოგადოებაში არსებულ საფუძვლიან კითხვებს, არამედ კიდევ უფრო გააღრმავეთ რწმენა, რომ თქვენ ხართ ჩვენი ქვეყნის ომში ჩართვის პროექტის ნაწილი!
ჯერ კიდევ ორი თვის წინ, საჯაროდ, ასევე ბეჭდური სახით(ფოსტის მეშვეობით) წარმოგიდგინეთ მიმართვა, სადაც ვითხოვდით გამოგეხატათ მკაფიო პოზიცია ჩვენთვის უმნიშვნელოვანეს საკითხებზე. სამწუხაროდ, თქვენ ყურად არ იღეთ და იმის ღირსიც არ გაგვხადეთ, რომ პასუხი გაგეცათ საზოგადოებიდან წამოსული კითხვებისთვის. იმავე წერილში ხაზი გავუსვით, რომ თქვენი მხრიდან ლეგიტიმური კითხვების უპასუხოდ დატოვება, განამტკიცებდა მოსაზრებას, რომ სწორედ თქვენ ხართ დაინტერესებული საქართველოს ომში ჩართვით და ამ მიზნისთვის, არჩეული ხელისუფლების შეცვლაზე მუშაობთ. მაგრამ თქვენ, ხალხის ამ სამართლიან და საფუძვლიან მოსაზრებას, რუსული ნარატივი უწოდეთ! სინამდვილეში კი, თქვენი ასეთი ქმედებები და განცხადებებია რუსული პროპაგანდის მკვებავი და საქართველოში ანტიდასავლური განწყობების ხელშემწყობი. ვერანაირი რუსული “რბილი ძალა” ვერ მოახერხებდა უფრო მეტის დაშავებას, ვიდრე ეს თქვენ მოახერხეთ ბოლო პერიოდში! სამწუხაროდ, თქვენ, ქართველი ხალხის მოკავშირეობას, მასთან კონფრონტაცია არჩიეთ!“- მიმართვას ვატო შაქარიშვილი კელი დეგნანას და იმ შემთხვევებს შეახსენებს, რომელთა გამოც იქმნება შთაბეჭდილება ელჩის არასწორი დამოკიდებულებების შესახებ.
„ჩვენ არ გვახსოვხართ არც ერთ მართლმადიდებლურ დღესასწაულზე, მაგრამ არ გამოგიტოვებიათ არც ერთი ლგბტ ღონისძიება! არ გვახსოვს შეშფოთება გამოგეხატათ, როდესაც ჩვენს ეკლესიას თავს ესხმოდნენ, მაგრამ ხშირად გვევლინებით დამნაშავეების და ოდიოზური ფიგურების დამცველად!
თქვენგან არ გვახსოვს არც ერთი ადამიანის მხარდაჭერა, როდესაც ნაცმედიები ცილსწამებენ, შეურაცხყოფას აყენებენ და ძალადობენ მათზე, მაგრამ გვახსოვხართ სანაიას და გვარამიას გვერდით(შეგახსენებთ, რომ ამ უკანასკნელს, უკანასკნელი სიტყვებით ჰყავხართ გალანძღული)!
თქვენ, საქართველოში უამრავ დამსახურებულ, ნიჭიერ, კეთილსინდისიერ და ღირსეულ ადამიანს არ უსმენთ, მაგრამ ეყრდნობით ლომჯარიასა და გიგაურებს! ჩვენ არ გთხოვთ გიყვარდეთ საქართველო! გვესმის, რომ თქვენი მარწმუნებელი ქვეყნის ინტერესებს ემსახურებით, მაგრამ გთხოვთ მინიმალურს – პატივისცემა არ იყოს ცალმხრივი! პატივი ეცით ჩვენს წარსულს და აქ, აწმყოში პატივი ეცით ჩვენს ეროვნულ ინტერესს – მშვიდობის შენარჩუნების სურვილს! ჩვენ თავისუფლების მოყვარე ხალხი ვართ! ბატონს არ შევეგუებით, რა ეროვნებისაც არ უნდა იყოს ის! მხოლოდ ქართველებს, ჩვენა გვაქვს ეს სიტყვა – უფალი და მხოლოდ ჩვენ ვართ, ჩვენი თავის – უფალი!“- ნათქვამია ვატო შაქარიშვილის წერილში.
ცნობისათვის, აბსურდული და ტყუილებით სავსე უწოდა აშშ-ის ელჩმა კელი დეგნმანმა დეპუტატ მიხეილ ყაველაშვილის მიმართვას, სადაც დეპუტატი ელჩისაგან გარკვეულ კრიტიკულ კითხვებზე პასუხების გაცემას ითხოვდა.
