მდიდრები და ღარიბები: როგორ ცხოვრობენ ქართული სოფლები – ჭორვილა და შუქრუთი – BBC
ბრიტანული სამაუწყებლო კომპანიის „ბიბისის“ (BBC) რუსულენოვანმა სამსახურმა (BBC russian) მოამზადა ვრცელი ვიდეორეპორტაჟი საქართველოდან სათაურით „მდიდრები და ღარიბები: როგორ ცხოვრობენ ქართული სოფლები – ჭორვილა და შუქრუთი” (ავტორი – ოლღა ივშინა, კორესპონდენტი).
გთავაზობთ 25-წუთიანი ვიდეომასალის მოკლე შინაარსს:
„იმ მიზნით, რომ გაგვეგო როგორ ცხოვრობენ ადამიანები საქართველოში, გადავწყვიტეთ თბილისიდან შორს გავმგზავრებულიყავით და საპარლამენტო არჩევნებიდან რამდენიმე დღის შემდეგ გავემართეთ ქვეყნის ერთ-ერთ ყველაზე პრობლემურ (უბედურ) და ყველაზე უპრობლემო (ბედნიერ) სოფლებში“, – ამბობს რეპორტაჟის დასაწყისში ბრიტანული სამაუწყებლო კომპანიის ჟურნალისტი.
“ბედნიერ სოფელში – ჭორვილაში – ბიძინა ივანიშვილია დაბადებული, მილიარდერ-ოლიგარქი და მმართველი პარტიის „ქართული ოცნების“ დამაარსებელი. ჭორვილაში კარგი გზებია, სახლები შეკეთებულია, მოსახლეობის კომფორტით ცხოვრება უზრუნველყოფილია. ჭორვილელები სიამოვნებით საუბრობენ იმაზე, თუ რა დიდი მხარდაჭერა აქვს საჩხერის მუნიციპალიტეტს ბიძინა ივანიშვილის მიერ დაფუძნებული საქველმოქმედო ფონდებიდან და სახელმწიფოსაგან. „ჭორვილაში, შეიძლება ითქვას, ცხოვრება საამურია“, – ხაზს უსვამს რეპორტაჟის ავტორი.
უბედურ სოფელში – შუქრუთში – მარგანეცის მადნის საბადოა. შუქრუთელები საპროტესტო აქციებს აწყობენ და ცდილობენ თავიანთ სიტუაციას სახელმწიფო ორგანოების ყურადღება მიაპყრონ. საქმე იმაშია, რომ ამ სოფელში საცხოვრებელი სახლები ავარიულ მდგომარეობაშია, მიწაში ნაპრალებია გაჩენილი, ნაგებობები ინგრევა. მიზეზი – მიწისქვეშ არსებული მარგანეცის მომპოვებელი ძველი, მიტოვებული მაღაროების ნგრევის გამო ნიადაგის ჩაწოლა ხდება. სოფლის მცხოვრებელები დიდი ხანია ჩივიან, რომ ხელისუფლება მათ პრობლემის მოგვარებას სათანადო ყურადღებას არ აქცევს. მართალია, კომპენსაციები ზოგიერთმა შუქრუთელმა მიიღო, მაგრამ არა იმდენი, რამდენიც საჭირო იყო. ისისნი იძულებულნი გახდნენ სოფელი მიეტოვებინათ და ქალაქში დასახლებულიყვნენ. ამჟამად სოფელში დარჩენილი უკმაყოფილო შუქრუთელები საქმეში ლევან სამხარაულის სახელობის ექსპერტიზის ეროვნული ბიუროს თანამშრომლების ჩართვას და ობიექტური დასკვნის მომზადებას ითხოვენ.
კომპანია „ქართული მარგანეცის“ მტკიცებით, მარგანეცის მოპოვება საქართველოს ეკოლოგიური კანონმდებლობის და საერთაშორისო სტანდარტების სრული დაცვით ხდება, სახლების ნგრევა კი საბჭოთა პერიოდში მადნის მოპოვების წესების დარღვევითაა გამოწვეული.
კომპანია მსახლეობას კომპენსაციას უხდის, რათა შუქრუთელების სოციალურ-ეკონომიური პრობლემა როგორმე მოაგვაროს, თუმცა შეთავაზებული თანხა ძალიან მცირეა და რეალობას არ ითვალისწინებს.
