ვოლოდიმირ ზელენსკიმ ალექსეი არესტოვიჩს სანქციები დაუწესა
უკრაინის პრეზიდენტმა, ვოლოდიმირ ზელენსკიმ ხელი მოაწერა ბრძანებას, რომლის მიხედვითაც, ძალაში შედის ქვეყნის ეროვნული უსაფრთხოებისა და თავდაცვის საბჭოს გადაწყვეტილება პერსონალური სანქციების დაწესების შესახებ.
ბრძანება პრეზიდენტის ადმინისტრაციის ოფიციალურ ვებგვერდზე გამოქვეყნდა.
სულ შეზღუდვები დაწესდა 76 პირსა და 81 კომპანიას, მათ შორის შავ სიაში შეიყვანეს პრეზიდენტის ადმინისტრაციის ყოფილი მრჩეველი ალექსეი არესტოვიჩი, რომელიც უკრაინაში არ იმყოფება.
ბრძანების თანახმად, არესტოვიჩის წინააღმდეგ დაწესებული სანქციები ითვალისწინებს სახელმწიფო ჯილდოების ჩამორთმევას, აქტივების ბლოკირებას, უკრაინის გარეთ კაპიტალის გატანის, უკრაინის ტერიტორიაზე მედიის გავრცელებისა და უკრაინაში პრივატიზაციაში მონაწილეობის აკრძალვებს.
ცნობისთვის, აპრილის შუა რიცხვებში არესტოვიჩმა გააკრიტიკა უკრაინის ხელისუფლება ჟურნალისტებისა და ბიზნესმენების წინააღმდეგ დაწესებული სანქციების გამო. კერძოდ, მან განაცხადა, რომ სანქციები, სავარაუდოდ, პოლიტიკურ ოპონენტებთან ანგარიშსწორების ინსტრუმენტად იქცა.
ალექსეი არესტოვიჩმა უკრაინის პრეზიდენტის ადმინისტრაციის ხელმძღვანელის მრჩევლის პოსტი 2023 წლის იანვარში დატოვა. ეს მას შემდეგ, რაც მან გამოთქვა ვარაუდი, რომ დნეპრში საცხოვრებელი სახლს რუსული რაკეტა უკრაინის საჰაერო თავდაცვის სისტემით ჩამოგდების შედეგად დაეცა.
უკრაინაში არესტოვიჩის წინააღმდეგ ორი სისხლის სამართლის საქმე აღძრეს, ერთი „ძალადობის პროპაგანდისთვის“, მეორე ცრუ ჩვენების მიცემისთვის.
რუსეთში არესტოვიჩს ბრალი წაყენებული აქვს ტერორიზმისკენ საჯარო მოწოდებებისა და რუსეთის არმიის შესახებ „ფეიკების“ გავრცელებისთვის, ის შეიყვანეს როსფინმონიტორინგის „ტერორისტებისა და ექსტრემისტების“ სიაში და დაუსწრებლად მისჯილი აქვს პატიმრობა.
