მსოფლიოში სიდიდით მეორე ტანსაცმლის საცალო გაყიდვების შვედური ბრენდი H&M, უკრაინაში შეჭრის გამო, რუსეთის ბაზარს სრულად ტოვებს -  ინფორმაციას Reuters-ი ავრცელებს.

კომპანიამ რუსეთში გაყიდვები ჯერ კიდევ 2 მარტს შეაჩერა.

„საგულდაგულო განხილვის შემდეგ, შეუძლებლად მიგვაჩნია რუსეთში ჩვენი ბიზნესის გაგრძელება არსებული სიტუაციიდან გამომდინარე. ვწუხვართ იმ გავლენის გამო, რასაც ეს ნაბიჯი ჩვენს კოლეგებზე მოახდენს“, - ნათქვამია კომპანიის აღმასრულებელი დირექტორის, ჰელენა ჰელმერსონის განცხადებაში.

კომპანიის განცხადებით, რუსეთში არსებული მაღაზიები დროებით, შეზღუდული ვადით, განაახლებენ მუშაობას, რათა გაიყიდოს საქონლის არსებული მარაგები.

გავრცელებული ცნობით, H&M-ს რუსეთის ბაზრიდან გასვლა დაახლოებით 2 მილიარდი შვედური კრონა (190 მილიონი აშშ დოლარი) დაუჯდება.

H&M  1947 წელს შვედეთში დაარსდა.

H&M ბრენდის გარდა, კომპანია ასევე ფლობს COS, Monki, & Other Stories, Weekday, ARKET და Afound ბრენდებს, ასევე H&M Home საყოფაცხოვრებო საქონლის მაღაზიების ქსელს.

რუსეთის უკრაინაში შეჭრის შემდეგ, რუსული ბაზარი ასობით საერთაშორისო ბრენდმა დატოვა.