“ჩემო მურუს, ახლა შენ ამას თუ გინდა მუქარა დაარქვი, მე მხილებას ვეძახი…” – სოსო გოგაშვილი ლევან მურუსიძეს

სახელმწიფო უსაფრთხოების სამსახურის უფროსის, ყოფილი მოადგილე, ბრალდებული სოსო გოგაშვილი მოსამართლე ლევან მურუსიძეს სასჯელაღსრულების დაწესებულებიდან პასუხობს.

ინფორმაციაში, რომელიც გოგაშვილის „ფეისბუქგვერდზეა“ განთავსებული, გოგაშვილი ლევან მურუსიძესთან მის ურთიერთობაზე საუბრობს. როგორც გოგაშვილი აცხადებს, სწორედ მურუსიძე და თავად „ალაგებდნენ“ „ოცნების“ სასარგებლოდ სასამართლო დავების გადაწყვეტის საკითხს.

სუს-ის ყოფილი მაღალჩინოსანი ასევე აცხადებს, რომ მისი დაკავების შემდეგ, ლევან მურუსიძე მისი დაცვის წევრს შეხვდა და უთხრა, რომ „ის და ჩინჩალაძე ყველაფერს ეცდებოდნენ საქმის დასალაგებლად, რასთან დაკავშირებითაც, გოგაშვილმა მას პასუხი მოგვიანებით გაუგზავნა კვლავ დაცვის წევრის საშუალებით, რომ ის ბინძური სისტემის მხილებას აპირებდა“.

„ლევან მურუსიძეს ვიცნობ 1995 წლიდან. იგი გავიცანი „სახალხო პარტიის“ ვაკის ახალგაზრდულ ორგანიზაციაში, თუმცა, მას შემდეგ ურთიერთობა არ გვქონია. ურთიერთობა აღდგა მას შემდეგ, რაც ჩინჩალაძე და მურუსიძე გარიგდნენ ივანიშვილთან. ჩინჩალაძის მოთხოვნით კოორდინაცია დამყარდა სუს-თან და მთავარი საკონტაქტო პირები „ოცნების“ სასარგებლოდ დავების გადაწყვეტის ნაწილში ვიყავით მე და მურუსიძე. ინტერესის სფერო არ იყო მხოლოდ საარჩევნო დავები, რა თქმა უნდა ნებისმიერი შეკვეთა, რაც პარტიიდან მოდიოდა, უნდა შეესრულებინათ. საჭიროების შემთხვევაში, ჩვენი სამსახურიდან ჩინჩალაძესთან და მურუსიძესთან იგზავნებოდა ოპერატიული მასალაც მოსამართლეების შესახებ. ჩვენი შეხვედრები იმართებოდა ჩემს საცხოვრებელ სახლში, დიღომში სასამართლოსთან და ასევე, იუსტიციის საბჭოსთან.

ასევე, ჩინჩალაძესა და მურუსიძეს კახეთში, კერძოდ, დედოფლის წყაროში აქვთ 100 ჰექტრამდე მიწის ნაკვეთი, რომელიც შეიძინეს ჩემი დახმარებით 2016 წელს. ნაკვეთები გაფორმებულია მათ სანდო პირზე, ხოლო ამ მიწის მოვლაში მათ სჭირდებოდათ მცოდნე ადამიანი, ვისი მოძებნაც მე მთხოვეს. მე ეს ადამიანი მათ დავაკავშირე. 2016 წლიდან ჩემს დაკავებამდე ისინი ჩემი დაცვის წევრის საშუალებით იყვნენ კავშირზე, იღებდნენ ინფორმაციას ჩემგან, თავის მხრიდან მიგზავნიდნენ მეც მოსამართლეების შესახებ, ვისი კონტროლიც აინტერესებდათ. ჩემი დაცვის წევრის საშუალებით აგზავნიდნენ მიწის დამუშავების თანხას. ეს თანხა ხან მურუსიძეს ნუცუბიძეზე მოჰქონდა ჩემს სახლში. როდესაც ხდებოდა მოსავლის (მარცვლეული) აღება და რეალიზაცია, მათ ჩემი დაცვის წევრი რეალიზაციისგან მიღებულ თანხას, დაახლოებით 150 000 – 200 000 ლარს აწვდიდა ხან საცხოვრებელ სახლში ძეგვში, ხან სასამართლოსთან დიღომში, ზოგჯერ თანხის ასაღებად მურუსიძე თავად მოდიოდა ჩემთან სახლში. მოკლედ მურუსიძეს ჩემთან და ჩემი დაცვის წევრთან, სამხარაძესთან ჰქონდა აქტიური ურთიერთობა.

ჩემი დაკავების შემდეგ სამხარაძესა და მურუსიძეს შორის შედგა შეხვედრა, რა დროსაც მან სამხარაძეს უთხრა, რომ ის და ჩინჩალაძე ყველაფერს ეცდებოდნენ, რომ ჩემი საქმე დაელაგებინათ, მე პასუხი დაგვიანებით, მაგრამ გავუგზავნე სამხარაძის საშუალებით, რომ მე ვაპირებდი ბინძური სისტემის მხილებას, ვისაუბრებდი სასამართლოზეც და მათ გადამალულ ქონებებზეც.

ჩემო მურუს, ახლა შენ ამას თუ გინდა მუქარა დაარქვი, მე ამას მხილებას ვეძახი“, – წერს სოსო გოგაშვილი.

ცნობისთვის, სააპელაციო სასამართლოს მოსამართლემ, ლევან მურუსიძემ 21 სექტემბერს, იუსტიციის უმაღლესი საბჭოს სხდომაზე განაცხადა, რომ სუს-ის უფროსის ყოფილმა მოადგილემ სოსო გოგაშვილმა მას პირადად მიმართა წერილით, სადაც ციხიდან გათავისუფლების შესახებ დახმარებას სთხოვა, წინააღმდეგ შემთხვევაში კი, „გოგაშვილი გარკვეული ნაბიჯის გადადგმაზე საუბრობდა სასამართლოს წინააღმდეგ“.

მურუსიძის თქმით, ის შესაბამისი მტკიცებულებებით პროკურატურას უახლოეს პერიოდში მიმართავს.