“არ ვაპირებ ქვეყნის ნაწილის გაყიდვას იაფი გაზის სანაცვლოდ”- მაია სანდუ
მოლდოვის პრეზიდენტის, მაია სანდუს განცხადებით, არ სურს ქვეყნის ნაწილის გაყიდვა „გაზპრომთან“ უფრო მომგებიანი, მაგრამ მოკლევადიანი კონტრაქტის გაფორმების სანაცვლოდ.
მისი თქმით, ქვეყანა ამ ზამთარს ენერგოდაზოგვის რეჟიმისთვის უნდა მოემზადოს.
როგორც მოლდოვის პრეზიდენტი აცხადებს, მოლდოვამ ხელი მოაწერა კონტრაქტს რუსულ „გაზპრომთან“ იმ პირობებით, რაც შეიძლებოდა გაკეთებულიყო იმ დროს, მოსკოვის პოლიტიზებული პოზიციის გათვალისწინებით.
„არ ვაპირებ ქვეყნის ნაწილის გაყიდვას მხოლოდ იმიტომ, რომ ნახევარი წლით იაფი გაზი გვქონდეს. ჩვენი ქვეყანა დამოუკიდებელია და ჩვენ უნდა დავიცვათ იგი. დიახ, ყველასთვის რთულია. და, რაც მთავარია, იმის გამო, რომ ამ ხნის განმავლობაში ჩვენ არ ვეძებდით ალტერნატივებს, არ ვდებდით ინვესტიციას ენერგეტიკულ პროექტებში, რადგან მაშინ ჩვენ ეს არ გვაინტერესებდა“, – განაცხადა მოლდოვის პრეზიდენტმა.
მაია სანდუმ უსაყვედურა ოპოზიციურ პარტიებს წამგებიანი კონტრაქტის კრიტიკის გამო და აღნიშნა, რომ მათ თავად არ მოაწერეს ხელი „გაზპრომთან“ გრძელვადიან ხელშეკრულებას, როცა ხელისუფლებაში იყვნენ და „მოსკოვს ემსახურებოდნენ და არა თავიანთ მოქალაქეებს“.
„მათ ვერ შეძლეს და ეს ჩვენთვისაც შეუძლებელია, რადგან არ არის საბაზრო პირობები. ფასი არ არის საბაზრო, არამედ სპეკულაციურია. იქმნება გარემოებები, რომ გაზის ფასი ზედმეტად მაღალი იყოს“, – განაცხადა მოლდოვის პრეზიდენტმა.
