“პუტინი ვერ მიაღწევს თავის მიზნებს უკრაინასა და ევროპაში” – ოლაფ შოლცი
პუტინი ვერ მიაღწევს თავის მიზნებს უკრაინასა და ევროპაში, დასავლეთი უკრაინას დახმარებას გაუწევს, მათ შორის სამხედრო მხარდაჭერას. ამის შესახებ გერმანიის კანცლერმა ოლაფ შოლცმა ბრიუსელში ევროკავშირის სამიტის წინ გერმანიის ბუნდესტაგში გამოსვლისას განაცხადა.
გერმანიის მთავრობის მეთაურმა აღნიშნა, რომ პუტინის სისასტიკე უკრაინაში, ენერგიისა და შიმშილის იარაღად გამოყენება, ინფლაციის წარმოუდგენელი მატება – ეს ყველაფერი ევროპისა და მსოფლიოს გამოცდად იქცა, რაც ათწლეულის განმავლობაში არ ყოფილა.
“პუტინი მიმართავს ტერორს უკრაინაში, იყენებს უპასუხისმგებლო ბირთვულ რიტორიკას. თუ ის ფიქრობს, რომ დასავლეთის სისუსტეებზე ითამაშებს და სამყაროს გახლეჩს, ის ცდება. ჩვენ არ მივცემთ უფლებას დასავლეთი დაყოს… ჩვენი ქვეყანა ერთად დგას, ევროპა ერთად დგას, სოლიდარულია ერთმანეთთან და უკრაინასთან, ჩვენი ალიანსები მთელ მსოფლიოში ძლიერია. პუტინი თავის მიზნებს ვერ მიაღწევს“, – აღნიშნა შოლცმა.
მან აღნიშნა, რომ პუტინის მიზნები ვერ განხორციელდება – როგორც უკრაინელების გამბედაობის, ისე მისი მეგობრებისა და პარტნიორების დახმარების წყალობით.
კანცლერმა ხაზგასმით აღნიშნა, რომ ახლა უკრაინას ყველაზე მეტად სჭირდება არტილერია და საჰაერო თავდაცვის სისტემები. მან გაიხსენა, რომ გასულ კვირას პირველი IRIS-T საჰაერო თავდაცვის სისტემა უკრაინას დაგეგმილზე ადრე გადაეცა. „მომდევნო სამი კი უმოკლეს დროში გადაეცემა “, – პირობას დებს შოცი.
მან ყურადღება გაამახვილა იმ ფაქტზე, რომ ყველა გადატანილი იარაღი მნიშვნელოვან როლს ასრულებს ბრძოლის ველზე.
ფედერალური მთავრობის მეთაურმა ასევე აღნიშნა, რომ გერმანია გახდება ევროპის ერთ-ერთი ქვეყანა, სადაც 15 000-მდე უკრაინელი სამხედრო მოსამსახურე გაივლის წვრთნებს. მისი თქმით, გაზაფხულამდე გერმანიაში “სრული ბრიგადა – 5000-მდე ჯარისკაცი” გადამზადდება.
შოლცმა დაგმო აგრესიული სარაკეტო და თვითმფრინავების თავდასხმები უკრაინაში სამოქალაქო ობიექტებზე ბოლო ორი კვირის განმავლობაში.
„სამოქალაქო მოსახლეობაზე განზრახ თავდასხმები ომის დანაშაულია, მაგრამ ეს გადამწვარი მიწის ტაქტიკა არ დაეხმარება პუტინს ამ ომის მოგებაში“, – ხაზგასმით აღნიშნა კანცლერმა. მან ამას პუტინის სასოწარკვეთილების აქტი უწოდა, ისევე როგორც მობილიზაცია.
პოლიტიკოსმა ხაზგასმით აღნიშნა, რომ „მოსკოვის ახალი ესკალაცია უპასუხოდ არ დარჩენილა“, ეს მხოლოდ აძლიერებს დასავლეთის გადაწყვეტილებას. უახლესმა სანქციების პაკეტმა კიდევ უფრო გაზარდა ზეწოლა კრემლზე. და ეს გაგრძელდება მანამ, სანამ რუსეთი განაგრძობს ომს.
“უკრაინა წარმატებით დაიცავს თავს და ჩვენ დავეხმარებით მას, რამდენადაც საჭირო იქნება”, – გაიმეორა გერმანელმა პოლიტიკოსმა. პუტინს ევროპელების გაყოფის იმედი ჰქონდა, მაგრამ საპირისპიროს მიაღწია, აღნიშნა მან.
შოლცმა ასევე ხაზი გაუსვა უკრაინის აღდგენაში დახმარების მნიშვნელობას, რაც, მისი თქმით, იქნება “ამოცანა ერთი თაობისთვის”.
მან გაიხსენა 25 ოქტომბერს ბერლინში დაგეგმილი ექსპერტთა კონფერენცია, რომელზეც „უკრაინის საერთაშორისო მარშალის გეგმა“ განიხილება.
შოლცმა სასიხარულო ამბავი უწოდა, რომ უკრაინის ფინანსური საჭიროებები დაიფარება წლის ბოლომდე, რომელშიც მნიშვნელოვან როლს ასრულებს შვიდეულის ჯგუფი (რომელსაც ამჟამად ხელმძღვანელობს გერმანია).
კანცლერმა ასევე გაიმეორა, რომ რუსეთის ფედერაცია აღარ შეიძლება ჩაითვალოს სანდო სავაჭრო პარტნიორად და რომ ევროპა რუსეთზე ენერგოდამოკიდებულებისგან თავისუფლდება.
20-21 ოქტომბერს ბრიუსელში ევროკავშირის სახელმწიფოთა და მთავრობათა მეთაურთა სამიტი გაიმართება.
