საზოგადოებაში პოლარიზაციის გაღვივებას ცდილობენ, ამის დაფინანსება მოდის ევროპული ორგანიზაციებიდან, მცდელობა აქვთ, დამნაშავეები გმირებად შერაცხონ -კახა კალაძე
საზოგადოებაში პოლარიზაციის გაღვივებას ცდილობენ, ამის დაფინანსება მოდის ევროპული ორგანიზაციებიდან. მცდელობა აქვთ, დამნაშავეები გმირებად შერაცხონ, – ამის შესახებ თბილისის მერმა, კახა კალაძემ განაცხადა.
კალაძეს კითხვა დაუსვეს საქართველოში ევროკავშირის წარმომადგენლობის მიერ გამოქვეყნებულ ვიდეორგოლზე, სადაც ბექა კობახიძე საუბრობს.
„ცდილობენ, საზოგადოებაში პოლარიზაცია გააღვივონ. სამწუხაროა, რომ ამის დაფინანსება მოდის ევროპული ორგანიზაციებიდან. მცდელობა აქვთ, დამნაშავეები, მოძალადეები გმირებად შერაცხონ. პირველ რიგში, ეს აზიანებთ მათ, ევროპულ მომავალს, ევროინტეგრაციის პროცესს. ამაში პირდაპირ არიან ჩართული კონკრეტული ელჩები, კონკრეტული ქვეყნების წარმომადგენლები“, – განაცხადა კახა კალაძემ.
მისივე თქმით, კონკრეტული ევროპული ქვეყნების წარმომადგენლები უახლოეს წარსულშიც აქტიურად ცდილობდნენ, საქართველოში სხვადასხვა გზით სახელმწიფო გადატრიალება მოეწყოთ.
„პირდაპირ ჩართული იყვნენ, რომ ქვეყანაში სახელმწიფო გადატრიალება მომხდარიყო თავისი დაფინანსებით, იდეოლოგიით. არ გახსოვთ, ტრენინგებზე დაჰყავდათ ხალხი, თითქოს მძიმე სენით დაავადებული ბავშვების მშობლებს ატრენინგებდნენ, რეალურად, რევოლუციაზე მიმდინარეობდა საუბარი“, – აღნიშნა კახა კალაძემ.
