არჩევნები ოპოზიციას რომ მოეგო, ბრიუსელში იტყოდნენ, დემოკრატია ასეთი ძლიერი არასდროს ყოფილაო, მოიგო კონსერვატიულმა პარტიამ და ყველაფერს აკეთებენ, რომ მოქალაქეთა სურვილი უარყონ -პიტერ სიიარტო

არჩევნები ოპოზიციას რომ მოეგო, ბრიუსელი ხმამაღლა იყვირებდა საქართველოში დემოკრატიის შესახებ, იტყოდნენ, რომ საქართველოში დემოკრატია ასეთი ძლიერი არასდროს ყოფილა, მაგრამ არჩევნები კონსერვატიულმა პარტიამ მოიგო და ისინი ყველაფერს აკეთებენ, რათა მოქალაქეების სურვილის უარყოფა და იგნორირება მოახდინონ, – ამის შესახებ უნგრეთის საგარეო საქმეთა მინისტრმა, პიტერ სიიარტომ განაცხადა.

როგორც პიტერ სიიარტომ საქართველოს საგარეო საქმეთა მინისტრთან, მაკა ბოჭორიშვილთან ერთობლივ პრესკონფერენციაზე განაცხადა, ბრიუსელი კითხვის ნიშნის ქვეშ აყენებს ქართველი ხალხის ნებას, რომელიც მათ გამოხატეს დემოკრატიული არჩევნების გზით.

„არჩევნები ოპოზიციას რომ მოეგო, ბრიუსელი ხმამაღლა იყვირებდა საქართველოში დემოკრატიის შესახებ, იტყოდნენ, რომ საქართველოში დემოკრატია ასეთი ძლიერი არასდროს ყოფილა, მაგრამ კონსერვატიულმა პარტიამ მოიგო და ისინი ყველაფერს აკეთებენ, რათა მოახდინონ მოქალაქეების სურვილის უარყოფა და იგნორირება. და ამას აკეთებენ სრულიად არადემოკრატიულ სტილში. ისინი კითხვის ნიშნის ქვეშ აყენებენ ქართველი ხალხის ნებას, რომელიც მათ გამოხატეს დემოკრატიული არჩევნების გზით. ეს არის სერიოზული და, მოდი, ასე ვთქვათ, მოსაწყენი თამაში, რომელსაც ლიბერალური მეინსტრიმი თამაშობს, რომელიც იქნება უარყოფილი. მინდა, კიდევ ერთხელ გავიმეორო, რომ უნგრეთი სრულად არის ერთგული საქართველოს ევროინტეგრაციის მისწრაფებებისა და ნებისმიერი სახის მხარდაჭერას უწევს მაშინ, როდესაც ბრიუსელი და ლიბერალური მეინსტრიმი ყველაფერს აკეთებს საქართველოს გაუცხოებისთვის, რაც ძალიან მავნებლური და სახიფათო მიდგომაა ბრიუსელისგან“, – განაცხადა პიტერ სიიარტომ.

ამასთან, პიტერ სიიარტომ მაკა ბოჭორიშვილთან ერთობლივ პრესკონფერენციაზე განაცხადა, რომ შეხვედრაზე მათ ქვეყნებს შორის ორმხრივ ურთიერთობებზე ისაუბრეს.

„მოვუწოდებთ ქართველებს, დაიცვან საკუთარი ინტერესები და გააგრძელონ ეროვნული სუვერენიტეტის დაცვა. ბოლო 14-15 წლის გამოცდილება აჩვენებს, რომ ჩვენ უნდა გავითვალისწინოთ ის, რაც ხალხს სურს და არა ის, რაც სურთ სხვადასხვა გარე ძალას. ბოლოს მინდა, ვთქვა, რომ დღეს ვისაუბრეთ ორმხრივ ურთიერთობებზე. ჩვენ დავამყარეთ სტრატეგიული პარტნიორობის შეთანხმება, რასაც წლების წინ მოვაწერეთ ხელი. სავაჭრო ბრუნვა გაზრდილია 34%-ით. უნგრული ავიაკომპანია „ვიზეარი“ არის ლიდერი საჰაერო ტრანსპორტირების სფეროში. უნგრული ფარმაცევტული კომპანიების საქმიანობა მუდმივად იზრდება. ჩვენ ყოველწლიურად ვთავაზობთ ქართველ სტუდენტებს სტიპენდიებს უნგრეთის უნივერსიტეტებში სასწავლებლად. ასევე ვმუშაობთ, რათა მივიღოთ მწვანე ენერგია აზერბაიჯანიდან საქართველოს გავლით, რაც უნდა მოხდეს ზღვის ფსკერზე გამავალი კებელით“, – განაცხადა პიტერ სიიარტომ.