“რატომ არ სურთ მათ ამ კანონის მიღება, ეს უკვე საზოგადოებაშიც ძალიან დიდ ეჭვს იწვევს” – ირაკლი ქადაგიშვილი ოპოზიციაზე

რატომ არ სურთ მათ ამ კანონის მიღება, ეს უკვე საზოგადოებაშიც ძალიან დიდ ეჭვს იწვევს, – განაცხადა ოპოზიციის შესახებ საპროცედურო საკითხთა და წესების კომიტეტის თავმჯდომარემ, ირაკლი ქადაგიშვილმა გამჭვირვალობის კანონპროექტზე საუბრისას.

“ოპოზიციის პოზიცია არის ის ნარატივი, რაც ერთი წლის წინ ითქვა, რომ ეს კანონი არის რუსული. ამის უკან, გარდა იმისა, რომ ელჩმა თქვა, არც ერთი არგუმენტი არ არსებობს. გამომდინარე აქედან, რატომ არ სურთ მათ ამ კანონის მიღება, ეს უკვე საზოგადოებაშიც ძალიან დიდ ეჭვს იწვევს. ანუ მართლა არის აქ დაფარული ფული და ამ დაფარული ფულის გამოაშკარავება არ უნდათ. სხვა არგუმენტი, რატომ არის გამჭვირვალობა რუსული და გაუმჭვირვალობა ევროპული, ლოგიკური ახსნა ამას არ გააჩნია”, – განაცხადა ირაკლი ქადაგიშვილმა.

პარლამენტის პლენარულ სხდომაზე „უცხოური გავლენის გამჭვირვალობის შესახებ“ კანონპროექტის პირველი მოსმენით განხილვა დღეს გაგრძელდება. ფრაქცია „ქართული ოცნების“ მიერ ინიცირებული პროექტი პლენარულ სხდომას გუშინ მამუკა მდინარაძემ წარუდგინა.