“ევროპისთვის მნიშვნელოვანია, რომ რუსეთმა ვეღარავის შეუტიოს” – ანჯეი დუდა
პოლონეთის პრეზიდენტის ანჯეი დუდას განცხადებით, პოლონეთი, გერმანია და საფრანგეთი „დღეს აბსოლუტურად გაერთიანებულნი არიან საერთო ინტერესებით“, რათა რუსეთი უკრაინასთან ომში დამარცხდეს. ამის შესახებ მან გერმანიის კანცლერ ოლაფ შოლცთან და საფრანგეთის პრეზიდენტ ემანუელ მაკრონთან ერთობლივ პრესკონფერენციაზე განაცხადა.
„ჩვენ ყველანი არა მხოლოდ ევროკავშირისა და ჩრდილოატლანტიკური ალიანსის წევრები ვართ, არამედ, უპირველეს ყოვლისა, დღეს ყველანი ძალიან მტკიცედ ვართ უკრაინის მხარეზე და გააზრებული გვაქვს ერთი რამ – „რუსეთი ვერ მოიგებს ამ ომს“, – აცხადებს დუდა.
პოლონეთის პრეზიდენტმა ხაზგასმით აღნიშნა, რომ ფუნდამენტურად მნიშვნელოვანია მთელი ევროპის უსაფრთხოებისთვის, ევროკავშირის მომავლისთვის, რომ რუსეთს აღარასოდეს ჰქონდეს პოტენციალი რომ სხვას დაესხას თავს.
დუდას თქმით, პოლონეთი მრავალწლიანი ძალისხმევის შემდეგ დასავლეთის დემოკრატიული ქვეყნების საზოგადოების ნაწილი გახდა.
„დღეს უკრაინელებსაც იგივე სურთ, მათ სურთ პოლიტიკურად შეუერთდნენ დასავლურ საზოგადოებას, ჩვენ ეს შესაძლებელი უნდა გავხადოთ სხვა საკითხებთან ერთად“, – დასძინა ანჯეი დუდამ.
