რუსული „ლასტოჩკა“ სოხუმში შევიდა – TASS
სოხუმში რუსული ელექტრომატარებელი, „ლასტოჩკა“ სატესტო რეჟიმით პირველად შევიდა. ინფორმაციას TASS ავრცელებს.
მანამდე, 2023 წლიდან „ლასტოჩკა“ სოჭიდან მხოლოდ გაგრაში შედიოდა.
სატესტო რეისით აფხაზეთის რკინიგზის დე ფაქტო გენერალურ დირექტორ არსოუ ჭითანავამ რუსეთის რკინიგზის სპეციალისტებთან ერთად იმგზავრა. მან ჟურნალისტებს განუცხადა, რომ მატარებელი გაგრიდან სოხუმამდე ყველა პლატფორმაზე, სადგურზე, გვირაბში ჩერდებოდა, რომ სპეციალისტებს ყველა ხარვეზი დაეთვალიერებინათ და აღერიცხათ. მიზანი იყო ლიანდაგისა და სარკინიგზო ინფრასტრუქტურის დეტალური შემოწმება იმის დასადგენად, „თუ რამდენად სწრაფად და ეფექტურად შეიძლება, აღდგეს მუდმივი მიმოსვლა სოხუმთან.“
ცნობისთვის: მოსკოვიდან სოხუმში ყოველ მეორე დღეს ჯერ მხოლოდ მოსკოვი-სოხუმი-მოსკოვის სამგზავრო მატარებელი დადის, რომელიც 20 აპრილიდან უკვე ყოველდღიურ რეჟიმში მოძრაობს. ამასთან, 29 მაისიდან სოხუმის სადგურზე მატარებელი ყოველდღე სანქტ-პეტერბურგიდანაც ჩავა, ხოლო სამარიდან აფხაზეთში შარშანდელი მარშრუტი წელს გაუქმდება.
