იმედი მაქვს, საკონსტიტუციო სასამართლო მიიღებს დადგენილებას, რომ პრეზიდენტმა დაარღვია საქართველოს კონსტიტუცია -გურამ მაჭარაშვილი

იმედი მაქვს, რომ საკონსტიტუციო სასამართლო მიიღებს გადაწყვეტილებას, რასაც ჰქვია დადგენილება, რომ პრეზიდენტმა დაარღვია საქართველოს კონსტიტუცია, – ამის შესახებ „ხალხის ძალის“ წევრმა, გურამ მაჭარაშვილმა განაცხადა.

„ჩვენ გვაქვს საპარლამენტო და არა საპრეზიდენტო მმართველობა. ბევრი იურიდიული თავსატეხი აქ ნამდვილად არ არის, რადგან პრეზიდენტსა და მის წარმომადგენლებს პროცესზე აღიარებითი ჩვენებები აქვთ მიცემული, რომ მან კონსტიტუცია დაარღვია, ამიტომ იმედი მაქვს, რომ საკონსტიტუციო სასამართლო მიიღებს გადაწყვეტილებას, რასაც ჰქვია დადგენილება, რომ პრეზიდენტმა დაარღვია საქართველოს კონსტიტუცია“, – აღნიშნა მაჭარაშვილმა.

საკონსტიტუციო სასამართლოს მიერ პრეზიდენტის იმპიჩმენტის საკითხის გადაწყვეტილების მიღების ვადის ამოწურვამდე ცოტა დრო რჩება. დაარღვია თუ არა პრეზიდენტმა ქვეყნის ძირითადი კანონი – გადაწყვეტილება ამაზე 9 მოსამართლისგან შემდგარმა პლენუმმა უნდა მიიღოს. დასკვნა პარლამენტს კონსტიტუციით დადგენილ ვადებში, 14 ოქტომბრამდე წერილობით უნდა გადაეგზავნოს. თუმცა, ვინაიდან ხვალ უქმე დღეა, გადაწყვეტილება შესაძლოა მომდევნო კვირის ორშაბათს გახდეს ცნობილი.