კორუცფცია სერიოზული გამოწვევაა მთელ მსოფლიოში – მიხარია, რომ ჩვენი ქვეყანა, ამ მიმართულებით განხორციელებული რეფორმების თვალსაზრისით, მოწინავეა -კახა კალაძე
კორუფცია სერიოზული გამოწვევაა ყველგან, მთელ მსოფლიოში და ევროპულ ქვეყნებშიც, – ამის შესახებ თბილისის მერმა, კახა კალაძემ ევროპის ანტიკორუფციული კვლევების ცენტრის მიერ, ევროპის ქვეყნებში კორუფციის რისკის მიზეზებისა და ტენდეციების შესახებ გამოქვეყნებული ანგარიშის შეფასებისას განაცხადა.
კალაძის განმარტებით, საქართველო ამ მიმართულებით განხორციელებული რეფორმების თვალსაზრისით, მოწინავეა.
„ზოგადად კორუფცია სერიოზული გამოწვევაა ყველგან, მთელ მსოფლიოში და ევროპულ ქვეყნებშიც. რაც შეეხება საქართველოს, ჩვენ აღნიშნული მიმართულებით პრევენციული ღონისძიებების თვალსაზრისით კონკრეტულ ნაბიჯებს ვდგამთ. ძალიან მიხარია, რომ ქვეყანა ამ მიმართულებით განხორციელებული რეფორმების თვალსაზრისით, მოწინავეა. საქართველოსთან დაკავშირებით ბოლო წლების განმავლობაში ჩატარებული ყველა საერთაშორისო სტატისტიკა და კვლევები, იმ ორგანიზაციების მიერ, რომლებიც სამართლიანია, მიუთითებს, რომ ქვეყანა წინ მიდის, ახორციელებს რეფორმებს და დგამს სწორ ნაბიჯებს”, – განაცხადა კახა კალაძე.
რაც შეეხება ევროკავშირის ზოგიერთი წარმომადგენლის მიერ საქართველოსთან დაკავშირებით გაკეთებულ კრიტიკულ განცხადებებს, კახა კალაძე მიიჩნევს, რომ კრიტიკის მიზეზი ის მითითებებია, რომლებიც საქართველოს ხელისუფლებამ ქვეყნის ინტერესებიდან გამომდინარე არ შეასრულა.
„არ უნდა მივაქციოთ დიდი ყურადღება. ჩვენ ხომ ვიცით, რატომ ხდება ეს კრიტიკა და რა არის ამის მთავარი მიზეზი – ის, რომ ჩვენ არ შევასრულეთ მათი ბრძანებები, არ გავხსენით მეორე ფრონტი ქვეყანაში, არ შემოვიტანეთ ის უბედურება, რაც, სამწუხაროდ, დღეს უკრაინაში ხდება. მეორე – ეს არის მოწოდებები სანქციებთან დაკავშირებით, რომელიც არ გავითვალისწინეთ, რადგან დამაგრეველი და დამაზიანებელი იქნებოდა ჩვენი ქვეყნისთვის, ქვეყნის ეკონომიკისთვის, იმ ოჯახებისთვის, ადამიანებისთვის, რომლებიც შრომობენ, მუშაობენ და თავიანთი წვლილი შეაქვთ ქვეყნის ეკონომიკაში. ეს იქნებოდა უმძიმესი პროცესი ჩვენი ქვეყნისთვის. ჩვენ დავდექით მტკიცედ, მივიღეთ ის გადაწყვეტილებები, რომლებიც, პირველ რიგში, ჩვენს ქვეყანას და მის მომავალს სჭირდებოდა. ეს პოლიტიკა გაგრძელდება მომავალშიც. ეს არის მიზეზი, რატომაც ვისმენთ კრიტიკას”, – აღნიშნა კახა კალაძემ.
