ლაშა ცანავა წესიერი კაცია, დახმარებას თუ სთავაზობდა უცხო ქვეყნის მოქალაქეებს, ამაში დანაშაული სად არის, თუმცა სუს-ის აგენტი მიუგზავნეს და კამერით გადაუღეს -ლევან ხაბეიშვილი
ლაშა ცანავა წესიერი კაცია, დახმარებას თუ სთავაზობდა უცხო ქვეყნის მოქალაქეებს, ამაში დანაშაული სად არის?! თუმცა სუს-ის აგენტ-პროვოკატორი მიუგზავნეს და კამერით გადაუღეს, – ამის შესახებ „ერთიანი ნაციონალური მოძრაობის“ პოლიტსაბჭოს თავმჯდომარე ლევან ხაბეიშვილი სოციალური ქსელში წერს.
როგორც ხაბეიშვილი აღნიშნავს, ლაშა ცანავას იგი არცერთ ბრძოლაში დაუტოვებია მარტო და სიცოცხლის ფასად ეფარებოდა.
„ეს კაცი ჩემი ძმაკაცია და არცერთ ბრძოლაში არ დავუტოვებივარ კი არა, ჩემ წინააღმდეგ „ტიტუშკის“ მოქნეულ ქვას, ხელს, ხელკეტს თავის თავსა და მუშტს უშვერდა. სიცოცხლის ფასად მეფარებოდა ყველა ჯერზე და მხოლოდ ამიტომ მოუწყვეს პროვოკაცია.
წესიერი კაცია, მშრომელი – ოჯახი და შვილები რომ გამოეკვება, დაცვაში მუშაობდა, ღამეებს ათენებდა, მძღოლადაც მუშაობდა რიგ შემთხვევაში და შეხება ჰქონდა უცხო ქვეყნის მოქალაქეებთან. დახმარებას თუ სთავაზობდა საბუთების მოწესრიგებაში, ამაში დანაშაული სად არის?! იუსტიციის სახლთან ასეთი დახმარების შეთავაზებით ასობით ადამიანი დგას და მუშაობს. მაგრამ ლაშას სუს-ის აგენტ-პროვოკატორი მიუგზავნეს და კამერით გადაუღეს.
საზოგადოება კარგად ხედავს ჩემ წინააღმდეგ წარმოებულ კამპანიას შიდა თუ გარე მტრის მიერ. არ დავიღლები და ვერც ამ ფორმით გამტეხთ! თუ ვინმეს ჰგონია, რომ ლაშა ცანავას სახელს და გვარს დავემალები, ძალიან შემცდარა!!! ძმობა, მეგობრობა და კაცობა უპირველეს ყოვლისა“, – წერს ხაბეიშვილი.
ცნობისთვის, სუს-მა ბინადრობის ნებართვის სანაცვლოდ უცხო ქვეყნის მოქალაქის ფულადი თანხის მოტყუებით დაუფლების ფაქტზე „ნაციონალური მოძრაობის“ პოლიტიკური საბჭოს წევრი ლაშა ცანავა დააკავა.
