ჩემი წინამორბედი გამოდის და ამბობს, ხელისუფლება არ გვყავსო, ამით პირდაპირ ზიანს აყენებს ქვეყანას და აი, ეს არის მიუღებელი-მიხეილ ყაველაშვილი

დღეს ვიმყოფებით აჭარის ტერიტორიაზე, მანამდე ქობულეთში დავესწარით საკოორდინაციო შტაბის სხდომას, აჭარაში სიტუაცია ბევრად უკეთესია, ამინდმაც შეუწყო ხელი და დარწმუნებული ვარ, რამდენიმე დღეში ყველაფერი, თითქმის 100%-ით აღდგენილი იქნება, – ამის შესახებ საქართველოს პრეზიდენტმა, მიხეილ ყაველაშვილმა განაცხადა.

მისი თქმით, დარჩა რამდენიმე ლოკაცია, სადაც მიმდინარეობს გზების გაწმენდა.

„დარჩა რამდენიმე ლოკაცია, სადაც მიმდინარეობს გზების გაწმენდა. ყველა ადმინისტრაციულ ცენტრში არის გაწმენდილი გზები. ასევე ელექტროენერგიის მხრივ, თითქმის 90%-ი აღდგენილია ქობულეთის რაიონში. დარჩენილია რამდენიმე ლოკაცია, სადაც საჭიროებს ელექტროენერგია აღდგენას. სტიქიისგან დაზღვეული არავინ არ არის. მთავარია, შემდეგ როგორ რეაგირებ და ამას აქვს ძალიან დიდი მნიშვნელობა. აჭარის მთავრობა, მისი მუნიციპალიტეტები, კოორდინაციის თემა აქ არის ძალიან მაღალ დონეზე. ასევე მინდა, გამოვყო უწყებები, კერძოდ, ინფრასტრუქტურის სამინისტრო. ჩემთან ერთად ბრძანდებოდა პრემიერ-მინისტრი, ინფრასტრუქტურის მინისტრი, თავდაცვის მინისტრი და შს მინისტრი“, – განაცხადა პრეზიდენტმა.

მიხეილ ყაველაშვილმა მეხანძრე-მაშველებს, თავდაცვის ძალების სამხედროებს მადლობა გადაუხადა, რომლებიც, მისი თქმით, 24-საათიან რეჟიმში მუშაობენ.

„აჭარაში მათი დახმარების საჭიროება არ არის, მაგრამ გურიაში და იმერეთში ალბათ იქნება საჭიროება, რომ ჩვენი მეხანძრე-მაშველები და სამხედროები უფრო ინტენსიურად იქნებიან ჩართული. კოორდინირებული მუშაობა გაგრძელდება. მთავარია, არცერთი მოქალაქე არ დარჩეს უყურადღებოდ. აჭარაში ეს მაღალ დონეზეა, მუშაობს ცხელი ხაზი და, სადაც გზა ჯერ გაწმენდილი არ არის, ყველასთან მყარდება კომუნიკაცია. შეიძლება, ავადმყოფი ადამიანი იყოს, სადაც ფიზიკურად ვერ ხერხდებოდეს მისვლა, მაგრამ ყველაფერი კონტროლის ქვეშ არის და ამისთვის, რა თქმა უნდა, მადლობა უნდა ვუთხრათ ჩვენს კოლეგებს. საზოგადოება უნდა იყოს იმედიანად. უსაფრთხოების საკითხია, როცა სტიქია მძვინვარებს ქვეყანაში, დაახლოებით ანალოგიურია, როცა ომი არსებობს. არსებობენ ადამიანები, ვინც დეზინფორმაციას ეწევიან ასეთ სიტუაციაში. ყველა მოქალაქემ უნდა იცოდეს, რომ სრული მობილიზაციაა. გუშინ, გუშინწინ, ხვალაც, ზეგაც გაგრძელდება. მთელი ეს პერიოდი ხომ ხედავდით, მთელი კვირის მანძილზე როგორ მუშაობდნენ. შესაძლებლობების ფარგლებში მაქსიმუმს აკეთებენ. სტიქიისგან დაზღვეული არავინ არ არის. მთავარია, როგორ რეაგირებ“, – განაცხადა მიხეილ ყაველაშვილმა.

საქართველოს პრეზიდენტის განცხადებით, როდესაც ქვეყანაში ასეთი ვითარებაა, დეზინფორმაციის გავრცელება მიუღებელია.

„ასეთ სიტუაციაში დეზინფორმაცია პირდაპირ ვნებს  სახელმწიფოს. მათი მოტივია, თითქოს აგრძნობინონ მოსახლეობას, რომ ხელისუფლება ვერაფერს აკეთებს. საზოგადოებას მინდა, ამაზე არ ჰქონდეს რეაგირება. მთავარი არის, რომ ყველა ადამიანთან იყოს კომუნიკაცია და ყველაფერი რიგზე იქნება. შეიძლება, რაღაც პრეტენზიები ნებისმიერ მთავრობასთან და ხელისუფლებასთან გქონდეს, მაგრამ ასეთ სიტუაციაში, ერთმანეთს მხარში რომ უნდა დავუდგეთ, ეს ბავშვმაც ძალიან კარგად იცის. ჩემი წინამორბედი, რომელიც ამბობს, ჩვენ ხელისუფლება არ გვყავსო, პირდაპირ ზიანს აყენებს ქვეყანას და ხელისუფლებას. აი, ეს არის მიუღებელი. საზოგადოებას მინდა ვუთხრა, მოვუსმინოთ იმ ადამიანებს, ვინც არის პასუხისმგებელი ამ ქვეყნის განვითარებაზე“, – განაცხადა მიხეილ ყაველაშვილმა.