ირაკლი კობახიძე – დღეს ძალიან ინერვიულა მთელმა ოპოზიციამ, ძალიან ინერვიულა სალომე ზურაბიშვილმა და ნერვიულობის ნიადაგზე პოსტიც კი მიუძღვნა ამ შეკრებას, მათი უფლებაა, ინერვიულონ, ჩვენ შეგვიძლია, ცივი წყალი გავუგზავნოთ
შევდივარ ჩვენი ოპონენტების მდგომარეობაში, დღეს ძალიან ინერვიულა მთელმა ოპოზიციამ, მათთან დაკავშირებულმა მედიასაშუალებებმა, სალომე ზურაბიშვილმა, – ამის შესახებ საქართველოს პრემიერ-მინისტრმა ირაკლი კობახიძემ გადაცემა „ღამის კურიერში” განაცხადა.
როგორც მთავრობის მეთაურმა აღნიშნა, უსუსურია ოპონენტების გზავნილები იმასთან დაკავშირებით, რომ თითქოს დღევანდელ შეკრებაზე მმართველ პარტიას საჯარო მოსამსახურეები ჰყავდა იძულებით მიყვანილი.
„მე შევდივარ ჩვენი ოპონენტების მდგომარეობაში. ეს არის ერთადერთი პასუხი, რაც მათ შეიძლება გაეცეთ. საბოლოო ჯამში, თქვენ დაინახავთ, თუ როგორი იქნება არჩევნების შედეგები. რაც შეეხება საჯარო მოსამსახურეებს, რა თქმა უნდა, საჯარო სამსახურებშიც ჩვენი რეიტინგი არის ძალიან მაღალი, მაგრამ ყველა საჯარო სამსახური ერთად რომ ავიღოთ, რაოდენობა არის შეზღუდული. პოლიცია და ჯარი საერთოდ ვერ მონაწილეობს შეკრებებში, როგორც მოგეხსენებათ, შესაბამისად ჯარი და პოლიცია რომ გამოაკლო, უკიდურესად შეზღუდულია საჯარო მოსამსახურეთა რაოდენობა. ანუ, ჩვენ რომ ყველა საჯარო მოხელე მიგვეყვანა იმ აქციაზე რომელიც დღეს გაიმართა, მაქსიმუმ 5% შეევსოთ ამ შეკრების. აქედან ჩანს, რამდენად უსუსურია ამ ადამიანების გზავნილები. შევდივარ მათ მდგომარეობაში, დღეს ძალიან ინერვიულა მთელმა ოპოზიციამ, მათთან დაკავშირებულმა მედიასაშუალებებმა, ძალიან ინერვიულა სალომე ზურაბიშვილმა და ამ ნერვიულობის ნიადაგზე პოსტიც კი მიუძღვნა ამ შეკრებას, ეს არის მათი მდგომარეობა. მათი უფლებაა, რომ ინერვიულონ, ჩვენ შეგვიძლია, რომ მათ ცივი წყალი გავუგზავნოთ,”- განაცხადა პრემიერმა.
