ჯო ბაიდენი 12 დეკემბერს ვოლოდიმირ ზელენსკის თეთრ სახლში მიიღებს
აშშ-ის პრეზიდენტი ჯო ბაიდენი 12 დეკემბერს უკრაინის პრეზიდენტს, ვოლოდიმირ ზელენსკის თეთრ სახლში უმასპინძლებს. ამის შესახებ ამერიკული მედია თეთრ სახლზე დაყრდნობით იუწყება.
როგორც „სიენენი“ წერს, უკრაინაში ომის დაწყების შემდეგ ეს იქნება უკრაინის პრეზიდენტის მეორე ვიზიტი აშშ-ში. ვოლოდიმირ ზელენსკი ვაშინგტონში პირველად სექტემბერში იმყოფებოდა.
უკრაინის პრეზიდენტის ოფისის ცნობით, ზელენსკი აშშ-ში სამუშაო ვიზიტით 11 დეკემბერს გაემგზავრება.
„უკრაინის პრეზიდენტი შეხვდება აშშ-ის პრეზიდენტს, ჯო ბაიდენს, გამართავს შეხვედრებისა და მოლაპარაკებების სერიას“, – აღნიშნულია უკრაინის პრეზიდენტის ოფისის განცხადებაში.
მათივე ცნობით, ზელენსკი ფოკუსირული იქნება უკრაინის მხარდასაჭერად რუსული ტერორისგან თავდაცვის მიმართ აშშ-ის, ევროპისა და მსოფლიოს ერთიანობის უზრუნველყოფაზე, წესებზე დაფუძნებული საერთაშორისო წესრიგის განმტკიცებასა და თითოეული ერის სუვერენიტეტის პატივისცემაზე.
„ვაშინგტონში მოლაპარაკებების მთავარ თემებს შორის იქნება უკრაინასა და შეერთებულ შტატებს შორის თავდაცვითი თანამშრომლობის გაგრძელება, კერძოდ, ერთობლივი პროექტები იარაღისა და საჰაერო თავდაცვის სისტემების წარმოებისთვის“, – აღნიშნულია განცხადებაში.
