გაერო-ში ისრაელის ელჩი აცხადებს, რომ ღაზაში 150-მდე მძევალია დაკავებული

ისრაელის ხელისუფლების ინფორმაციით, ღაზაში 150-მდე მძევალია დაკავებული. ამის შესახებ გაერო-ში ისრაელის ელჩმა განაცხადა.

„სიენენთან“ საუბრისას ისრაელის ელჩის, გილად ერდანის განცხადებით, ვიდრე ხელისუფლება იმედოვნებს, რომ დატყვევებულები სახლში უსაფრთხოდ დაბრუნდებიან, მათი მდგომარეობა ხელს არ შეუშლის ისრაელის ხელისუფლებას, გააკეთოს, რაც გასაკეთებელია და დაიცვას ისრაელის მომავალი.

„ჩვენ გვყავს მძევლების უპრეცედენტო რაოდენობა”, – განაცხადა ერდანმა და აღნიშნა, რომ ეს რიცხვი 150-მდეა.

მისივე თქმით, ყველა საერთაშორისო ორგანიზაცია ფოკუსირებას მოახდენს იმაზე, როგორ ეპყრობიან მძევლებს საერთაშორისო სამართლის მიხედვით.

„ჩვენ ველით, რომ წითელი ჯვარი და ყველა საერთაშორისო ორგანიზაცია ფოკუსირებას მოახდენს ამ მძევლებზე და იმაზე, რომ მათ ეპყრობიან საერთაშორისო სამართლის მიხედვით, მაგრამ ეს არ შეგვიშლის ხელს იმაში, რაც უნდა გავაკეთოთ ისრაელის მომავლის უზრუნველსაყოფად“, – აღნიშნა ერდანმა.

„ჰამასმა“ განაცხადა, რომ მძევლების სიკვდილით დასჯას დაიწყებს და მკვლელობები ვიდეოჩანაწერით გადაიცემა, თუ ისრაელი ღაზაში მცხოვრებ ხალხს გაფრთხილების გარეშე დაუმიზნებს.

ისრაელის ელჩმა, ერდანმა განუცხადა CNN-ს, რომ ისრაელი ვერ აღადგენს მოქალაქეებს უსაფრთხოებას, თუ „ჰამასი“ გააგრძელებს სამხედრო გაძლიერებას.

„რა თქმა უნდა, ჩვენ გვინდა, ვიხილოთ ჩვენი ბიჭები, გოგოები, მოხუცები, ყველა, ვინც გაიტაცეს, გვსურს, მათი დაბრუნება სახლში, მაგრამ ახლა, ჩვენი ყურადღება გამახვილებულია ჩვენს ეროვნულ სტრატეგიაზე, რაც არის „ჰამასის“ ტერორისტული შესაძლებლობების მოსპობა“, – განაცხადა ერდანმა.