![“დონალდ ტრამპი ყველაზე უარესი პრეზიდენტი აშშ-ის ისტორიაში, ჯო ბაიდენი კი მე-14 ადგილზეა“ – The Guardian](https://gttv.ge/wp-content/uploads/2023/01/1576722498-trampi.jpg)
“დონალდ ტრამპი ყველაზე უარესი პრეზიდენტი აშშ-ის ისტორიაში, ჯო ბაიდენი კი მე-14 ადგილზეა“ – The Guardian
ბრიტანულ გაზეთ „გარდიანში“ (The Guardian) გამოქვეყნებულია სტატია სათაურით „დონალდ ტრამპი – ყველაზე უარესი პრეზიდენტი აშშ-ის ისტორიაში, ჯო ბაიდენი კი მე-14 ადგილზეა“ (ავტორი – მარტინ ფენგელი).
გთავაზობთ პუბლიკაციის შინაარსს:
154 მეცნიერი მონაწილეობდა გამოკითხვაში, რომლის მიხედვით აშშ-ის პრეზიდენტების რეიტინგები შეფასდა, მათი საქმიანობის ისტორიული მნიშვნელობის თვალსაზრისით. ქვეყნის 45-ე პრეზიდენტმა დონალდ ტრამპმა ბოლო ადგილი დაიკავა – მისი რეიტინგი იმაზე ნაკლები აღმოჩნდა, რომლებიც მე-19 საუკუნეში „ისტორიულად საშინელ ხელმძღვანელებს“ ჰქონდათ, სამოქალაქო ომთან დაკავშირებით.
ჯო ბაიდენმა რეიტინგით მე-14 ადგილი დაიკავა. მას დამსახურებად უთვლიან იმას, რომ აშშ სირცხვილისაგან იხსნა, როცა მან არჩევნებში გაიმარჯვა და პრეზიდენტის პოსტი დონალდ ტრამპს არ დაუთმო, ანუ „ჯო ბაიდენმა პრეზიდენტობის ტრადიციული სტილი ააღორძინა“.
რეიტინგი შედგენილი იყო განსაზღვრული სისტემით – რესპონდენტებს თითოეული პრეზიდენტი უნდა შეეფასებინათ 0-დან 100-მდე შკალით, მათი დიდებისა და ავტორიტეტის გათვალისწინებით, სადაც 0 – წარუმატებელს, 50 – საშუალოს და 100 – დიდებული შედეგებს ნიშნავდა.
პირველი ადგილი დაიკავა აშშ-ის მე-16 პრეზიდენტმა აბრაამ ლინკოლმა, რომელმაც თავისი სახელი სამუდამოდ ჩაწერა ქვეყნის ისტორიაში – მონობის გაუქმებით. მან გაუსწრო 32-ე პრეზიდენტს ფრანკლინ დელანო რუზველტს, რომელიც უმაღლეს პოსტზე ოთხჯერ იყო არჩეული. სიაში მომდევნო ადგილები დაკავებულები აქვთ ჯორჯ ვაშინგტონს (აშშ-ის პირველ პრეზიდენტს), თომას ჯეფერსონს (მე-3 პრეზიდენტს) და ჰარი ტრუმენს (33-ე პრეზიდენტს).
ბარაკ ობამამ წინ წაიწია 9 პოზიციით, წინა გამოკითხვის შედეგებთან შედარებით და ამჟამად მე-7 ადგილს იკავებს.
საყურადღებოა ერთ-ერთი საინტერესო ფაქტი: ყოველი თანამედროვე პრეზიდენტ-დემოკრატის – ბარაკ ობამას, ბილ კლინტონის და ჯიმი კარტერის – რეიტინგი მომატებულია, ხოლო რესპუბლიკელი პრეზიდენტების – დაცემული. შარშანდელ გამოკითხვასთან შედარებით, რეიტინგი შეუმცირდა თვით რონალდ რეიგანსაც. გამოდის რომ, დემოკრატების რეიტინგმა ერთი მიზეზით მოიმატა – „ისინი დონალდ ტრამპის პარტიის წევრები არ არიან“. სხვათა შორის, დემოკრატი პრეზიდენტების რეიტინგზე გავლენა ვერ მოახდინა მათი საქმიანობის პოლიტიკურმა წარუმატებლობამ.
ამასთან, გამოკვლევის ავტორებმა აღიარეს, რომ მეცნიერები, რომლებიც გამოკითხვაში მონაწილეობდნენ, „მემარცხენე პოზიციებისაკენ იხრებიან“.