ტარიფები მოლაპარაკებებს არ ექვემდებარება, ენდეთ პრეზიდენტ ტრამპს-თეთრი სახლის პრესსპიკერი

ენდეთ პრეზიდენტ ტრამპს, – ასე უპასუხა აშშ-ის პრეზიდენტის პრესსპიკერმა, კეროლაინ ლევიტი აშშ-ში საფონდო ბირჟების ინდექსების შემცირებასთან დაკავშირებით დასმულ შეკითხვას.

კითხვაზე, შეუძლია თუ არა ტრამპს, გადახედოს რომელიმე ტარიფს, ვიდრე 5 აპრილს ძალაში შევა, თეთრი სახლის პრესსპიკერმა განაცხადა, რომ ტარიფები მოლაპარაკებებს არ ექვემდებარება.

„ის ყოველთვის მზადაა, აიღოს ტელეფონი ზარებზე პასუხის გასაცემად, მაგრამ მან გუშინ დაადგინა, რატომ ვაკეთებთ ამას“, – განაცხადა კეროლაინ ლევიტმა.

აშშ-ის საფონდო ბირჟები კლებით გაიხსნა. „დოუ ჯონსის“ ინდექსი – 2.8 პროცენტით, „ეს-ენ-პი“-ს 3.3 პროცენტით, ხოლო ტექნოლოგიური „ნასდაქის“ 4.4-პროცენტით არის შემცირებული. ასევე შემცირდა დიდი კომპანიების ღირებულება, მათ შორის „ნაიკის“ 11 პროცენტით ერთ მომენტში, „გეფის“ 18 პროცენტით, „ამაზონის“ შვიდი პროცენტით, „ეფლის“ ცხრა პროცენტით, „ჰარლი დევიდსონის“ კი 4.5 პროცენტით. ამ მონაცემებიდან გამომდინარე, მედიასაშუალებები აღნიშნავენ, რომ აქციების ღირებულება შეიძლება გაუმჯობესდეს დღის განმავლობაში და ვარდნა შეიძლება, მუდმივი არ იყოს.