ალეკო ელისაშვილი

„ჩემი ღრმა რწმენით, სამჯერ ზღვა ხალხი რუსთაველზე სწორედ იმისთვის გამოვიდა, რომ არავინ გაბედოს ჩვენი რუსეთში დაბრუნების მცდელობა და რომ ჩვენ ვითხოვთ ევროპის სრულფასოვან წევრობას. თუმცა, გაპოლიტიკოსებულმა ენჯეოშნიკებმა (რომლებიც თან კეკლუცობენ და პოლიტიკოსები არ ვართო იძახიან) გადაწყვიტეს, რომ მიტინგზე გადაეყენებინათ მთავრობა და თავები მინისტრებად გამოეცხადებინათ. რა თქმა უნდა, ეს ღიმილისმომგვრელი „ტექნიკური მთავრობანა“ ჩავარდა“, – წერს პარტია „მოქალაქეების“ ლიდერი ალეკო ელისაშვილი სოციალურ ქსელში.

მისი შეფასებით, დღეს მმართველი პარტია „ტაქტიკურად მოგებულია“.

„მოხდა ის რასაც, რამდენიმე დღის წინ ვამბობდი- ეს გაპოლიტიკოსებული ენჯეოშნიკები „ქართულ ოცნებას” გაძლიერებაში დაეხმარნენ. დღეს „ოცნებაა“ ტაქტიკურად მოგებული. ეს ხო ფაქტია? რატომ მოხდა ასე – რატომ გადაუგდეს მაშველი რგოლი გაპოლიტიკოსებულმა ენჯეოშნიკებმა ხელისუფლებას? შეგნებულად გააკეთეს ეს თუ შეუგნებლად? ამაზე მარჩიელობა არ მინდა. ფაქტია, რომ რასაც ჩვენ ვამბობდით და რაც მარტივად გასათვლელი იყო, ის მოხდა. ვითარება მარტივია – თუ გვინდა ევროკავშირის კანდიდატის სტატუსი, უნდა შევასრულებინოთ ხელისუფლებას 12 პუნქტი. სათანამშრომლოა, უნდა ვითანამშრომლოთ, საჩხუბარია, უნდა ვიჩხუბოთ, ქუჩაში დასადგომია, ქუჩაში უნდა ვიდგეთ. ერთადერთი მოთხოვნით ამ 6 თვის განმავლობაში – ხელისუფლებამ შეასრულოს 12 დავალება! მეტი მოთხოვნა ამ თვეების განმავლობაში არ უნდა გვქონდეს ნორმალურ ადამიანებს. „ტექნიკური მთავრობის” მოთხოვნა და მსგავსი სახლობანა მოთხოვნები, უნდა დავივიწყოთ ეს პერიოდი, ისევ ისეთ უცნაურ მდგომარეობაში რომ არ ჩაიგდონ მოთხოვნების ავტორებმა თავები. 12 დავალების შესრულება 6 თვეში – ესაა მთავარზე უმთავრესი ამ პერიოდში! ჩვენ, პარტია „მოქალაქეები” ამით ვიქნებით მხოლოდ დაკავებულები! საქართველო არის ევროპა! საქართველოს იქნება პოლიტიკურადაც ევროპის სრულფასოვანი ნაწილი! საქართველო აღარასოდეს იქნება რუსეთი!“, – წერს ალეკო ელისაშვილი.

ირაკლი ღარიბაშვილის გადადგომისა და ტექნიკური მთავრობის შექმნის მოთხოვნა არასერიოზულია. გულდასაწყვეტია, რომ ამხელა ენერგია გადაუჭრელი ამოცანის გადაწყვეტისკენ წავა და ვიცით, ეს ყველაფერი რითიც დამთავრდება – არც ღარიბაშვილი გადადგება და არანაირი ტექნიკური მთავრობა არ იქნება, – ამის შესახებ „მოქალაქეების“ წევრმა, ალეკო ელისაშვილმა განაცხადა.

მისი თქმით, „გულდასაწყვეტია, რომ ეს ყველაფერი არის ძალისხმევის ასხლეტის და გადატანის გზა“.

„არადა, მოცემულობაა, რომ მთელი ერისთვის მთავარი ამოცანა არის ის, რომ საქართველომ ევროკავშირის კანდიდატობა მიიღოს და ამისთვის ექვს-თვიანი ვადა გვითხრეს, კონკრეტული დავალებები მოგვცეს. მიტინგის ორგანიზატორების, ოპოზიციისა და „ქართული ოცნების“ მთელი ძალისხმევა მიმართული უნდა იყოს იმისკენ, რომ 12 რეკომენდაცია შევასრულოთ და რეალური პერსპექტივა მივიღოთ. ჩემთვის დანარჩენი სხვა ძალისხმევა გაუგებარი და არასერიოზულია. რა დროს რაღაც მთავრობის შექმნაა, რომელსაც არანაირი ლეგიტიმაცია არ აქვს? – მიტინგზე ხუთმა ადამიანმა გადაწყვიტა, რომ მთავრობამ შექმნას? – ეს ასე არ ხდება. პოლიტიკური მეცნიერების ანა-ბანაა, რომ მთავრობას ის აკომპლექტებს, ვინც არჩევნებში უმრავლესობას მიიღებს“, – განაცხადა ელისაშვილმა.

ოპოზიციონერი დეპუტატი აცხადებს, რომ „ქართულ ოცნებას“ ევროკომისიის რეკომენდაციების შესრულება უნდა მოსთხოვოს საზოგადოებამ.

„ქართულ ოცნებას“ თუ რეკომენდაციებს შევასრულებინებთ და სტატუსი მივიღეთ, ეს იქნება გაცილებით მნიშვნელოვანი. თუ ვერ შევასრულებინეთ, შემდეგ რიგგარეშე არჩევნებზეც ვილაპარაკოთ და „ქართული ოცნება“ ხელისუფლებაში არ უნდა დარჩეს. საზოგადოების ერთ ნაწილს რეალური ჰგონია ის, რომ ირაკლი ღარიბაშვილს გადააყენებენ, მთავრობას დააკომპლექტებენ, თავად იქნებიან მინისტრები და დეოლოგარქიზაცია რომ მოხდეს, ნორმალური სასამართლო რომ იყოს და დეპოლარიზაცია, ეს მიუღწეველი ჰგონიათ? – ეს ჩემთვის გამაოგნებელია. მთავრობის გადაყენების გჯერა და მინისტრი იქნები და დეპოლარიზაციის, არა? – მგონია, რომ ყველას ენერგია მიმართული უნდა იყოს იქით, რომ ეს 12 პუნქტი შევასრულებინოთ „ქართულ ოცნებას“ და ნაწილი ჩვენც შევასრულოთ. ზოგი პუნქტი მარტივია, რთულია სასამართლო და დეოლიგარქიზაცია, მაგრამ რთული ამოცანები უნდა შევასრულოთ. აპრიორი რომ ეუბნები, 12 პუნქტი არ მინდა, ანუ, ამით რას ამბობ – ევროკავშირის წევრობის კანდიდატობა არ მიიღო?“, – განაცხადა ელისაშვილმა.