უბრალოდ, სასაცილოა, რომ ბაჩიაშვილი ახლა ბიძინა ივანიშვილს აბრალებს რაღაცას, ამაზე მეტი სირცხვილი რა შეიძლება იყოს, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.
პაპუაშვილის თქმით, ეს ადამიანურ ზღვარს სცდება.
„არ ვიცი, ამაზე მეტი სირცხვილი რა შეიძლება იყოს, როცა ბაჩიაშვილი, რომელიც ბიძინა ივანიშვილმა თავისთან მიიყვანა, ივანიშვილს დაადანაშაულებს თანხების მითვისებაში. თქვენ იცით, ბაჩიაშვილის მიმართ რაც არის სადავო. არ ვიცი, რა ჰქვია მის ქცევას, ეს ხომ ადამიანურ ზღვარს სცდება. „ტვ პირველში“ იქნება, ხომ? მამუკა ხაზარაძის ტელევიზიაში. სხვათა შორის, 650 000 ისევ ჩასარიცხი აქვს მამუკა ხაზარაძეს საქართველოს ბიუჯეტში და იქნებ შეახსენოთ, რომ ფული არის გადასახდელი ბიუჯეტში.
სინამდვილეში, ეს არის იდეოლოგია. ხაზარაძეს უნდა, რომ მილიარდ-ნახევარი წაიღოს ბიუჯეტიდან. ანაკლიის პროექტი ჩაშალა საკუთარი სიხარბის გამო, რადგან უნდოდა, ჰქონოდა ბიზნესი, რომელიც მარტო მოგებაზე მუშაობს. უნდოდა, ჩვენს ხარჯზე, თითოეული ადამიანის, საკუთარი ტელევიზიის თანამშრომლების ხარჯზე ჰქონოდა გარანტირებული მომგებიანი ბიზნესი ანაკლიის პორტის სახით და თავისი სიხარბის გამო ჩაშალა. შემდეგ ბიუჯეტიდან ითხოვდა მილიარდ-ნახევარს. პოლიტიკაში იმის გამო წავედი, რომ დამჩაგრესო. არბიტრაჟმა უთხრა, თაღლილითი ხარ და არავის დაუჩაგრიხარო, იქით გაქვს 650 000 ბიუჯეტში გადასახდელიო და რას ელოდება, დღემდე რატომ არ იხდის? მილიონებს ხარჯავს საარჩევნი კამპანიაში, ბიუჯეტში ხალხს უნდა დაუბრუნოს 650 000.
იმავე სპექტაკლიდან არის ბაჩიაშვილს საქციელიც, რომელიც, სინამდვილეში, არის არა ადამიანური სისუსტე, არამედ იდეოლოგია, რომელიც ადამიანურ ზღვარს შლის, უმადურობისკენ მიჰყავს. უბრალოდ, სასაცილოა, რომ ეს ადამიანი ახლა ბიძინა ივანიშვილს აბრალებს რაღაცას“, – განაცხადა შალვა პაპუაშვილმა.
კითხვაზე, რა მიზანი აქვს ბაჩიაშვილს, რომ ამაზე საუბრობს, პაპუაშვილმა აღნიშნა:
„მამუკა ხაზარაძეს, როგორც „ტვ პირველის“ მფლობელს, ერთადერთი, რაც თავში უტრიალებს, არის ფული. ამიტომ ახლა ამ თემების გარშემო ტრიალებს და ბაჩიაშვილთან, ეტყობა, ამ მხრივ აქვს სულიერი კავშირი. რა უნდა ვილაპარაკოთ, ბოლო პერიოდში ერთ-ერთი პოპულარული ბიზნესმენი იყო, რესპონდენტი, რომელიც სასწაულ ამბებს ჰყვებოდა. ვაკვირდებით, ახლა მედიაში რა არის, რას ასკანდალებენ. წარმოგიდგენიათ, არჩევნების წინა დღეს არაფერი აქვთ სათქმელი, შესადავებელი „ქართულ ოცნებასთან“, ხელისუფლებასთან, ბიძინა ივანიშვილთან, გარდა იმისა, რომ რომელიღაც ადამიანმა იჭორაოს „ტვ პირველის“ ეთერში. თან ისეთი ამბით, რომელსაც, თვითონაც იციან, არავინ დაიჯერებს.
ბიძინა ივანიშვილმა თავისი ქონების უმეტესობა საქართველოს უანგაროდ მოახმარა. სხვათა შორის, დღემდე მადლობა არ მომისმენია იოანე-ზოსიმეს ხელნაწერის ჩამოტანასთან დაკავშირებით. ეს იყო ერთ-ერთი მისი ბოლო ქველმოქმედება. ვინ აძალებდა, რომ პირადი ქონების უმეტესობა დაეხარჯა საქართველოზე? ამას ხარჯავს და რა აბსურდია, ადამიანს დააბრალო რაღაც. რანაირად, როგორ შეიძლება? როგორც კი საქართველოში არის რამე თემა გასაჭირის ან ზოსიმეს ხელნაწერის შემთხვევაში – სიხარულის მოლოდინი, „ოცნების“ მხარდამჭერსაც და არამხარდამჭერსაც, ოპოზიციასაც – ყველას ახსენდება ბიძინა ივანიშვილი, როგორც ადამიანი, რომელიც გვერდით დაუდგება ქვეყანას.
ეკლესიაში არის სადმე რესტავრაცია ჩასატარებელი, ის გაიღებს ფულს, ხელნაწერი არის, ხუთმაგი ოდენობით იყიდის ამ ხელნაწერს, ოღონდ საქართველოში დაბრუნდეს, პრემია არის დასაწესებელი, რადგან გაგვახარეს და აქაც ბიძინა ივანიშვილია. მამუკა ხაზარაძეს კიდევ 650 000 ენანება ბიუჯეტში, ეს ფული აეღო და პრემიებში მაინც დაარიგოს, 3 000-ლარიანი ასაწყობი აუზი რომ ააშენა წალენჯიხაში. სინამდვილეში, ამ მორალის ხალხს მეტი არაფერი რომ არ აქვს სათქმელი ბიძინა ივანიშვილზე, დასტურია იმ დიდი გამარჯვებისა, რომელსაც ხვალ ქართველი ხალხი „ქართულ ოცნებასთან“ ერთად იზეიმებს“.
დღეს თანაინვესტირების ფონდმა საქართველოს თანაინვესტირების ფონდის გენერალური დირექტორის, დავით გალუაშვილის განცხადება გაავრცელა, სადაც გულუაშვილი ამბობს: „გავეცანი „ტვ პირველზე“ გასულ გადაცემას – „ნოდარ მელაძის შაბათის“ ანონსს, სადაც თანაინვესტირების ფონდის ყოფილი აღმასრულებელი დირექტორი გიორგი ბაჩიაშვილი საუბრობს გარკვეულ ციფრებზე, თითქოს ბატონ ბიძინა ივანიშვილს „მითვისებული“ აქვს ბიუჯეტიდან 400 მილიონი აშშ დოლარი და მიანიშნებს, თითქოს ბატონი ბიძინა პოლიტიკურ და ფინანსურ მაქინაციებში იყო ჩართული. ბაჩიაშვილისთვის თუ ცნობილი იყო თანხების მითვისების ფაქტი, რატომ აცხადებს ამას არჩევნების წინ, ჩნდება ეჭვი, რომ ხდება თემების პოლიტიზება“.
ამასთან, გიორგი ბაჩიაშვილის განცხადებას აბსურდული უწოდა ბიძინა ივანიშვილის ადვოკატმა თეიმურაზ წიქვაძემ: „ბაჩიაშვილის განცხადებას აბსურდულია, მასშტაბური დანაშაულის შესახებ თუ ჰქონდა ინფორმაცია, რატომ აქამდე არ გაამჟღავნა? მისი მიზანია, ზიანი მიაყენოს ჩემი მარწმუნებლის საქმიანობას“.
