სალომე ზურაბიშვილი, ისევე როგორც მთლიანად რადიკალური ოპოზიცია დადგა ლგბტ პროპაგანდის მხარეს -ეს არის არა მათი არჩევანი, არამედ – დავალება -კობახიძე
როდესაც ვერ ახერხებ, დადგე, სადაც დგას საზოგადოების უმრავლესობა, ეს ნიშნავს, რომ მოქმედებ მხოლოდ დავალაბებით და არა ხალხის ინტერესების შესაბამისად, – ამის შესახებ ჟურნალისტებს საქართველოს პრემიერ-მინისტრმა, ირაკლი კობახიძემ განუცხადა.
კობახიძეს კითხვა დაუსვეს „ოჯახური ღირებულებებისა და არასრულწლოვანის დაცვის შესახებ“ კანონზე, რომელსაც საქართველოს პრეზიდენტმა, სალომე ზურაბიშვილმა ხელი არ მოაწერა.
მისი თქმით, სალომე ზურაბიშვილი და ოპოზიცია დადგნენ ლგბტ პროპაგანდის მხარეს.
„სალომე ზურაბიშვილი, ისევე, როგორც მთლიანად რადიკალური ოპოზიცია, დადგა ლგბტ პროპაგანდის მხარეს. ეს არის მათი არჩევანი. უფრო სწორად, ეს არის არა მათი არჩევანი, არამედ მათი დავალება. წარმოიდგინეთ, ახლა არის საარჩევნო პერიოდი და ყველამ ძალიან კარგად იცის, რომ საზოგადოების 90 პროცენტზე მეტი მხარდაჭერა აქვს ამ კანონს. 92 პროცენტი დაფიქსირდა ბოლო კვლევაში ამ კანონის მიმართ მხარდაჭერა. ეს ყველამ ძალიან კარგად იცის. როდესაც ასეთ დროსაც შენ ვერ ახერხებ, დადგე ისეთ მხარეს, სადაც დგას საზოგადოების უდიდესი უმრავლესობა, ეს ნიშნავს იმას, რომ შენ მოქმედებ მხოლოდ დავალაბებით და არა საკუთარი ხალხის ინტერესების შესაბამისად“, – განაცხადა ირაკლი კობახიძემ.
„ოჯახური ღირებულებებისა და არასრულწლოვანის დაცვის შესახებ“ კანონს, რომელსაც სალომე ზურაბიშვილმა ხელი არ მოაწერა, დღეს საქართველოს პარლამენტის თავმჯდომარემ, შალვა პაპუაშვილმა მოაწერა ხელი.
