“პუტინი, თაკერ კარლსონისთვის მიცემულ ინტერვიუში, ამერიკას „მოლაპარაკების დაწყებისაკენ მოუწოდებს“
აშშ-ის გაზეთი „ნიუ-იორკ თაიმსი“ (The New York Times) თავის 9 თებერვლის ნომერში აქვეყნებს სტატიას სათაურით „ვლადიმერ პუტინი, თაკერ კარლსონისთვის მიცემულ ინტერვიუში, ამერიკას „მოლაპარაკების დაწყებისაკენ მოუწოდებს“ (ავტორი – ანტონ ტროიანოვსკი). მასში მიმოხილული და კომენტირებულია რუსეთის პრეზიდენტის საუბარი ამერიკელ ჟურნალისტთან, რომელიც კრემლში ამ ცოტა ხნის წინ გაიმართა.
თაკერ კარლსონისათვის მიცემულ ორსაათიან ინტერვიუში რუსეთის პრეზიდენტმა ვლადიმერ პუტინმა ამერიკის შეერთებულ შტატებს უკრაინის საკითხში მოლაპარაკებისაკენ მოუწოდა და ეს გააკეთა „შედარებით უფრო სწორხაზობრივად, ვიდრე ჩვეულებრივ აცხადებდა ხოლმე“. მისი თქმით, უკრაინის ომი არა სამხედრო გამარჯვებით, არამედ დასავლეთთან შეთანხმების დადებით დასრულდება, მაგრამ ამისათვის აშშ-მა უკრაინისათვის სამხედრო დახმარება უნდა შეწყვიტოს და უკრაინელი ლიდერები სამშვიდობო მოლაპარაკების დაწყებაში დაარწმუნოს.
„თქვენ უნდა უთხრათ უკრაინის ამჟამინდელ ხელისუფლებს, რომ ისინი გაჩერდნენ და მოლაპარაკების მაგიდასთან დასხდნენ“, – თქვა ინტერვიუში ვლადიმერ პუტინმა, შემდეგ პაუზა გააკეთა და დაამატა: „უკრაინაში უსასრულო მობილიზაციის შედეგად გამოწვეული [მოსახლეობის] უკმაყოფილება, ისტერია და საშინაო პრობლემები, ადრე თუ გვიან, კიევს შეთანხმებამდე მიიყვანს“.
როგორც ავტორი ანტონ ტროიანოვსკი წერს, ვლადიმერ პუტინის მონაწილეობამ ინტერვიუში ცხადყო მისი ტაქტიკური თავდაჯერებულობა საკუთარ ძალებში“ იმ დროს, როცა მისი მოწინააღმდეგეებს დასავლეთში მძიმე და სახიფათო დრო დაუდგათ.
სტატიაში აღნიშნულია, რომ ამჟამად უკრაინის არმია ფრონტზე წარუმატებლობას განიცდის, კიევის ჯარის შარშანდელი კონტრშეტევა ფაქტობრივად ჩაიშალა, რაც კრემლის წარმატებად შეიძლება ჩაითვალოს. დღეს უკრაინა ბრძოლის ველზე სირთულეების წინაშე დგას, ჯარისკაცებს აკლიათ იარაღი, საბრძოლო მასალები, აშშ და ევროკავშირი კიევს ძველებურად ვეღარ ეხმარებიან.
უპასუხა რა თაკერ კარლსონის კითხვას – რამდენად შესაძლებელია, რომ ნატო რუსეთის მიერ უკრაინის ტერიტორიის ნაწილის გაკონტროლებას დაეთანხმოს – ვლადიმერ პუტინმა აღნიშნა: „დაე, მათ მოიფიქრონ, რამდენად ღირსეულად შეიძლება ამის გაკეთება. ვარიანტები ყოველთვის არსებობს, მთავარია სურვილი იყოს“.
