NED-ს ფინანსებზე წვდომა შეეზღუდა. ორგანიზაციამ პროგრამების განხორციელება მთელ მსოფლიოში შეაჩერა
ამერიკის „დემოკრატიის ეროვნული ფონდი“ (NED) განცხადებას ავრცელებს, სადაც ნათქვამია, რომ ორგანიზაციას კონგრესის მიერ გამოყოფილ ფინანსებზე წვდომა შეეზღუდა, რის გამოც ის იძულებულია შეაჩეროს პროგრამების განხორციელება მთელ მსოფლიოში.
„დემოკრატიის ეროვნული ფონდი“ მოცემულ მომენტში ვერ ახერხებს წვდომას კონგრესის მიერ გამოყოფილ ფონდებზე, რომლითაც თითქმის ყველა გრანტი და ოპერაცია ხორციელდება. შედეგად, ორგანიზაციის 40-წლიანი მოღვაწეობის ისტორიაში პირველად მან საკუთარი ვალდებულებები ვერ შეასრულა და იძულებული გახდა შეეჩერებინა თითქმის 2 ათასი პარტნიორის მხარდაჭერა მთელ მსოფლიოში“.
განცხადებაში აგრეთვე აღნიშნულია, რომ ფონდის 95% კონგრესის მიერ ფინანსდება და საგარეო დახმარებად არ ითვლება. შესაბამისად, მასზე აშშ-ის პრეზიდენტის, დონალდ ტრამპის მიერ გამოცემული ბრძანება 90 დღით საგარეო დახმარების შეჩერების შესახებ არ უნდა ვრცელდებოდეს.
ამის მიუხედავად, როგორც NED-ში განმარტეს, ფინანსურ სახსრებთან წვდომა მიზეზების დასახელების გარეშე შეეზღუდათ, რამაც ორგანიზაცია იძულებული გახადა შეეწყვიტა პარტნიორული მხარდაჭერა და საკუთარი თანამშრომლების უმეტესობა დაეთხოვა.
