მინდა დღეს მთლიანად საქართველოს და განსაკუთრებით 50 ათასზე მეტ პირველკლასელს მივულოცო სწავლის დაწყება -გიორგი ამილახვარი
გიორგი ამილახვარმა მოსწავლეებს, პედაგოგებსა და მშობლებს ახალი სასწავლო წლის დაწყება მიულოცა. შესაბამისი განცხადება განათლების, მეცნიერებისა და ახალგაზრდობის მინისტრმა თბილისის რეაბილიტირებულ 160-ე სკოლაში სტუმრობისას გააკეთა.
„მინდა დღეს მთლიანად საქართველოს და განსაკუთრებით 50 ათასზე მეტ პირველკლასელს მივულოცო სწავლის დაწყება, მათ მშობლებს, მთლიანად სკოლის მოსწავლეებსა და პედაგოგებს.
დღეს იწყება ახალი სასწავლო წელი და გვაქვს უამრავი სიახლე. ახლა გავხსენით პრაქტიკულად სრულიად განახლებული, რეაბილიტირებული გლდანის 160-ე სკოლა, სადაც 1100-ზე მეტი ბავშვი სწავლობს, რაც 5 მილიონ ლარამდე დაჯდა. მიმდინარეობს ასევე მასშტაბური ინფრასტრუქტურული პროექტები მთელს ქვეყანაში და ეს სასწავლო წელი ნამდვილად გამორჩეულია სიახლეებით. მხოლოდ სექტემბრის ბოლომდე გაიხსნება 60 მსგავსი ახალი დიდი სკოლა ქვეყნის მასშტაბით და წლის ბოლომდე პრაქტიკულად 100 ახალი სკოლა გვექნება სისტემაში დასრულებული, განახლებული, სრულად აღჭურვილი თანამედროვე ინვენტარით, რომელიც 30 ათასამდე მოსწავლეს მოემსახურება.
ასევე, რა თქმა უნდა სრულად არის უზრუნველყოფილი საჭიროების მიხედვით ტრანსპორტირება, ასევე სახელმძღვანელოები და ბუქები გადაეცა ყველა პირველკლასელს“, – აღნიშნა მინისტრმა.
