კიმ ჩენ ინი რუსეთში ჩავიდა

ჩრდილოეთ კორეის ლიდერი კიმ ჩენ ინი რუსეთში ჩავიდა. ის ფხენიანიდან რუსეთში სპეცმატარებლით 10 სექტემბერს გაემგზავრა. ინფორმაციას რუსული პროპაგანდისტული სააგენტო „რია ნოვოსტი“ ავრცელებს.

კიმ ჩენს ინს თან ახლავს რამდენიმე მაღალჩინოსანი, სამხედრო პირები და საგარეო საქმეთა მინისტრი.

როგორც ცნობილია, რუსეთის პრეზიდენტ  ვლადიმირ პუტინისა და კიმის შეხვედრა ვლადივოსტოკში გაიმართება. მედიის ცნობით, პუტინიც უკვე ვლადივოსტოკშია.

4 სექტემბერს The New York Times წყაროზე დაყრდნობით წერდა, რომ კიმ ჩენი ინი სექტემბერში რუსეთში ვიზიტს გეგმავდა, რათა პუტინთან შეხვედრაზე რუსეთისთვს უკრაინის წინააღმდეგ ომში საბრძოლველად დიდი რაოდენობით იარაღის მიწოდების საკითხი განეხილა.

კრემლმა კიმ ჩენ ინის ვიზიტის შესახებ განცხადება მხოლოდ გუშინ, 11 სექტემბერს გაავრცელა.

შეგახსენებთ, თეთრი სახლი კიმ ჩენ ინის ვიზიტის ფონზე ჩრდილოეთ კორეას მოუწოდებს არ გადასცეს რუსეთს იარაღი.

„ჩვენ მოვუწოდებთ ჩრდილოეთ კორეას დაიცვას საჯარო ვალდებულებები, რომელიც ფხენიანმა აიღო და არ მიაწოდოს და არ მიჰყიდოს რუსეთს იარაღი“, – განაცხადა აშშ-ის ეროვნული უსაფრთხოების საბჭოს სპიკერმა ედრიენ უოტსონმა.