კახეთში დაზარალებული მევენახეები ყოველ დაზიანებულ ჰექტარზე 3 500 ლარის დახმარებას მიიღებენ
საქართველოს მთავრობის გადაწყვეტილებით, დაზარალებული მევენახეები ყოველ დაზიანებულ ჰექტარზე 3 500 ლარის დახმარებას მიიღებენ.
როგორც მთავრობის დღევანდელ სხდომაზე პრემიერ-მინისტრმა ირაკლი ღარიბაშვილმა განაცხადა, სახელმწიფო უკვე იბარებს დაზიანებულ ყურძენს, თუმცა ამის მიუხედავად, გადაწყდა მევენახეებისთვის დახმარების გამოყოფა, რაც მათ დაზიანებული ვენახის აღდგენაში დაეხმარება.
„მოგეხსენებათ, კახეთის რეგიონში ახლა ძალიან წარმატებულად მიმდინარეობს რთველი. მე პირადად მოვინახულე, ადგილზე ჩავედი და სიტუაცია არის ძალიან კარგი. მაქსიმალურად ვეხმარებით ჩვენს ხალხს. სამწუხაროდ, ძალიან ბევრ მევენახეს დაესეტყვა ათასობით ჰექტარი ვენახი, განადგურდა მათი მოსავალი. მიუხედავად იმისა, რომ ვთქვით, ჩვენ ამ დაზიანებულ ყურძენს ჩავიბარებთ და ჩავიბარეთ კიდევაც. უკვე დაწყებულია პროცესი, 20 მილიონი ლარის ღირებულების დაზიანებული, დასეტყვილი ყურძენი უკვე ჩაბარებული გვაქვს; ამის მიუხედავად, ვინაიდან მათ ზიანი მიადგათ, გადავწყვიტეთ, როგორც ორი წლის წინ გავაკეთეთ, ახლაც გვინდა, დავეხმაროთ დაზარალებულ მევენეხეებს და დაზიანებულ ერთ ჰექტარზე 3 500 ლარი გამოვყოთ დახმარების სახით. ვფიქრობ, ეს დაეხმარება მათ, გამოიყენენონ მიზნობრივად, ამ დაზიანებული ვენახის გადარჩენაში და შემდეგ კვლავ აღდგენაში“, – განაცხადა ირაკლი ღარიბაშვილმა.
