კახეთის რეგიონში ამ დროისთვის 50 ათასზე მეტი ტონა ყურძენია გადამუშავებული

კახეთის რეგიონში ამ დროისთვის გადამუშავებულია 50 ათასზე მეტი ტონა ყურძენი. მოსავლის დაბინავება აქტიურად მიმდინარეობს დედოფლისწყაროს, სიღნაღის, გურჯაანის, ლაგოდეხის, თელავის და ყვარლის მუნიციპალიტეტებში.

ღვინის საწარმოებს ყურძენი 3000-ზე მეტმა მევენახემ ჩააბარა. თითქმის სრულად დაბინავდა1200 ტონამდე სეტყვით დაზიანებული ყურძენი – 12 სექტემბერს თელავისა და ახმეტის მუნიციპალიტეტში, უხვმა ნალექმა და ძლიერმა სეტყვამ, სასოფლო-სამეურნეო სავარგულები, მათ შორის, 300 ჰექტრამდე ვენახის ფართობი დააზიანა. რთველის საკოორდინაციო შტაბში რეგისტრირებულია 400-მდე ღვინის კომპანია/მარანი, რომლებიც ყურძნის მიღება-გადამუშავების პროცესში ჩაერთვებიან;

რთველის საკოორდინაციო შტაბი 24-საათიან რეჟიმში მუშაობს. ყველა რესურსი მობილიზებულია იმისთვის, რომ დაზარალებულმა მევენახეებმა შეუფერხებლად შეძლონ მოსავლის დაბინავება. კახეთის რეგიონში საპროგნოზო მოსავალი 200-250 ათასი ტონაა.