![“დებატები “აგენტების კანონზე”: საქართველოს პრემიერმა გერმანიის ელჩი გააკრიტიკა”-Der Spiegel](https://gttv.ge/wp-content/uploads/2024/05/premieri.jpg)
“დებატები “აგენტების კანონზე”: საქართველოს პრემიერმა გერმანიის ელჩი გააკრიტიკა”-Der Spiegel
გერმანულ ცნობილ და გავლენიან ჟურნალში „შპიგელში“ (Der Spiegel) გამოქვეყნებულია სარედაქციო სტატია სათაურით “დებატები „აგენტების კანონზე“: საქართველოს პრემიერ-მინისტრმა გერმანიის ელჩი გააკრიტიკა”.
გთავაზობთ პუბლიკაციას მცირეოდენი შემოკლებით:
პოპულარული და საქართველოს პარლამენტმა, მასობრივი საპროტესტო აქციების მიუხედავად, სადაო კანონპროექტი [არასამთავრობო ორგანიზაციების] კონტროლის თაობაზე მაინც მიიღო. გერმანიის ელჩმა თბილისში კანონის მიღება გააკრიტიკა, რითაც ქვეყნის მთავრობის პრემიერ-მინისტრის ირაკლი კობახიძის რისხვა დაიმსახურა.
არასასურველი ელჩი?
პრემიერი აგდებულად გამოეხმაურა გერმანელი ელჩის პეტერ ფიშერის მოქმედებას და აღნიშნა, რომ „გერმანია ტრადიციულად, გავლენიან სახელმწიფოდ ითვლება, მაგრამ ასეთი ელჩი ბერლინს საქართველოში არ უნდა გამოეგზავნაო“.
ირაკლი კობახიძე იმოწმებს პეტერ ფიშერის ამასწინანდელ განცხადებას, რომლის თანახმად, ელჩმა საეჭვოდ ჩათვალა საქართველოს მიღება ევროკავშირში მანამ, სანამ სადაო კანონპროექტი ძალაში იქნება. ამ სამართლებრივი აქტის მიხედვით, მასობრივი ინფორმაციის საშუალებები და არასამთავრობო ორგანიზაციები, რომელთა ბიუჯეტი საზღვარგარეთიდან ფინანსდება მინიმუმ 20%-ით მაინც, „უცხოური გავლენის გამტარებელ“ იურიდიულ პირად უნდა დარეგისტრირდნენ. ანუ ისინი ხელისუფლების კონტროლს უნდა დაექვემდებარონ.
ქართული კანონი ეფუძნება რუსული ანალოგიურ კანონის დებულებებს, რის გამოც ათეულ ათასობით ქართველი ქუჩაში გამოვიდა და მონაწილეობა მიიღო საპროტესტო აქციებში, კანონის გაუქმების მოთხოვნით. კანონი გააკრიტიკეს საერთაშორისო დონეზეც, ევროპული ქვეყნების დიპლომატებმაც, მათ შორის პეტერ ფიშერმაც.
პრემიერ-მინისტრმა თქვა, რომ იგი გერმანიის ელჩის არასერიოზულ განცხადებებს მნიშვნელობას არ ანიჭებს. ირაკლი კობახიძემ გაიხსენა, რომ ელჩი ოპოზიციასაც ხვდებოდა, რაც „არასერიოზულ მოქმედებას წარმოადგენს“.
კენჭისყრა ხალხის წინააღმდეგ
კანონპროექტს „უცხოური გავლენის გამჭვირვალობის შესახებ“, რომელსაც „უცხოური აგენტების“ კანონპროექტსაც უწოდებენ, პროევროპულად განწყობილმა პრეზიდენტმა სალომე ზურაბიშვილმა ვეტო დაადო და განაცხადა, რომ ის რუსულ კანონს წარმოადგენსო, მაგრამ „ქართული ოცნების“ საპარლამენტო უმრავლესობამ ვეტო გადალახა. ოპოზიციურად განწყობილმა დეპუტატებმა კენჭისყრის დროს სხდომათა დარბაზი დატოვეს.
ევროკავშირმა საქართველოს მოუწოდა, რომ ევროინტეგრაციის გზას დაუბრუნდეს. პარლამენტის წინ თავმოყრილი ადამიანები ევროკავშირის დროშებს აფრიალებდნენ და „ქართული ოცნების“ დეპუტატების მისამართით გაჰყვიროდნენ – „რუსეთის მონებო!“.
კენჭისყრის შემდეგ აქციის მონაწილეებს კიდევ უფრო მეტი ადამიანი შეუერთდა, ისინი ევროკავშირისა და საქართველოს სახელმწიფო ჰიმნს ასრულებდნენ.
პრეზიდენტმა სალომე ზურაბიშვილმა დემონსტრანტებს სიტყვით მიმართა და მათი პროტესტისადმი თანადგომა გამოხატა. რომელი გვინდა – ევროპული მომავალი თუ რუსეთის მონობა?, – იკითხა პრეზიდენტმა, – „ქართული ოცნების“ 84 დეპუტატმა ქვეყნის ბედი არ უნდა გადაწყვიტოს, ამას ჩვენ – ყველა ერთად – გადავწყვეტთ“.
საქართველოს პერსპექტივა
გამოკითხვების თანახმად, საქართველოს მოსახლეობის 80%-ს ქვეყნის ევროკავშირში და ნატოში გაწევრიანება სურს.
საქართველოს ფორმალურად ევროკავშირში წევრობის კანდიდატ ქვეყნად ითვლება, გასული წლის დეკემბრიდან, მაგრამ დღევანდელ მთავრობას, ირაკლი კობახიძის პრემიერობით, იმაში ადანაშაულებენ, რომ ის ყოფილი საბჭოთა რესპუბლიკის კვლავ რუსეთთან დაახლოებას ცდილობს.
საეჭვოა, რომ გერმანელ ელჩზე პეტერ ფიშერზე საქართველოს პრემიერის კრიტიკამ იმოქმედოს და მასზე რაიმე გავლენა მოახდინოს. ელჩი იგივე კურსს ატარებს, რასაც მისი ხელმძღვანელი – გერმანიის საგარეო საქმეთა მინისტრი ანალენა ბერბოკი. კანონპროექტი მინისტრმაც მკვეთრად გააკრიტიკა: „დოკუმენტით უარყოფილია ქვეყნის მოსახლეობის უდიდესი ნაწილის ნება, რომელიც ყოველდღე გამოდის ქუჩაში ევროპული მომავლის იმედით“, – განაცხადა ანალენა ბერბოკმა „X-ქსელში“.
კავკასიური ქვეყანას მთავრობა ევროპისაგან აშორებს, მაგრამ კურსის შეცვლა შესაძლებელია და ჯერ კიდევ არ არის გვიანი.