“ცხრა დათქმის შესრულება მნიშვნელოვანია და პროცესში ოპოზიციაც უნდა მონაწილეობდეს” – რომან გოცირიძე

ცხრა დათქმის შესრულება მნიშვნელოვანია და ამ პროცესში ოპოზიციაც უნდა მონაწილეობდეს, – ამის შესახებ „ევროოპტიმისტების“ წევრმა, რომან გოცირიძემ განაცხადა.

მისი თქმით, ისეთი ფორმატი უნდა იყოს შერჩეული, რომელიც ფორმალური არ იქნება და ოპოზიციის აზრს გაითვალისწინებენ.

„ცხრა დათქმის შესრულება მნიშვნელოვანია და ამ პროცესში ოპოზიციაც უნდა მონაწილეობდეს. ოღონდ ისეთი ფორმატი უნდა იყოს შერჩეული, რომელიც იმ შეცდომას არ გაიმეორებს, რომელიც „ქართულმა ოცნებამ“ დაუშვა, როცა სამუშაო ჯგუფები არაფერს ნიშნავდა, რადგან ამ ფორმატში ოპოზიციის არცერთი რეკომენდაცია არ იყო გათვალისწინებული. ოპოზიცია ამ პროცესებისგან მთლიანად გარიყული იყო და შედეგიც იყო, რომ ცხრა რეკომენდაციიდან მხოლოდ სამი შესრულდა. საუბარი თუ იქნება იმაზე, როგორ უნდა გადავარჩინოთ ეროვნული ბანკი, რომლის საბჭო არის დაშლილი, ეროვნული ბანკის ფორმირებისა და მომავალი პრეზიდენტის საკითხზე თუ ხელისუფლება, პრეზიდენტი და ოპოზიცია ითანამშრომლებენ, ამ პროცესში მონაწილეობა რატომ არ უნდა მივიღოთ? გააჩნია, თანამშრომლობის რა ფორმატი იქნება შენარჩუნებული. რაც იყო, არ ვარგა. ისეთი ფორმატი უნდა იყოს, სადაც გათვალისწინებული იქნება ოპოზიციის აზრი, არ იქნება ფორმალური და ფასადური. ასეთ ფორმატში მონაწილეობას მივიღებ“, – განაცხადა გოცირიძემ.