აშშ-ის სააპელაციო სასამართლომ დონალდ ტრამპის მიერ დაწესებული ტარიფების უმეტესობა უკანონოდ ცნო
ამერიკის სააპელაციო სასამართლომ დაადგინა, რომ აშშ-ის პრეზიდენტის, დონალდ ტრამპის მიერ დაწესებული გლობალური ტარიფების უმეტესი ნაწილი უკანონოა.
გადაწყვეტილება ეხება ტრამპის „საპასუხო“ ტარიფებს, რომლებიც მან დაუწესა მსოფლიოს უმეტეს ქვეყნებს, ასევე დამატებით ტარიფებს, რომლებიც ტრამპმა შემოიღო ჩინეთის, მექსიკისა და კანადის წინააღმდეგ.
გადაწყვეტილებას ფედერალური სააპელაციო სასამართლოს შვიდმა მოსამართლემ დაუჭირა მხარი. ოთხი წინააღმდეგი იყო.
შედეგად, სასამართლომ უარყო ტრამპის არგუმენტი, რომ ტარიფები დაშვებული იყო საგანგებო ეკონომიკური უფლებამოსილების შესახებ აქტით.
სასამართლომ ეს ტარიფები „უკანონოდ და კანონის საწინააღმდეგოდ“ მიიჩნია. როგორი პრაქტიკული შედეგი მოჰყვება ამ გადაწყვეტილებას ამ ეტაპზე გაურკვეველია. მოსალოდნელია, რომ საქმე უზენაეს სასამართლომდე მივა.
ცნობისთვის, სააპელაციო სასამართლოს გადაწყვეტილება ძალაში 14 ოქტომბრამდე არ შევა, რათა ტრამპის ადმინისტრაციას ჰქონდეს დრო, მოითხოვოს საქმის განხილვა უზენაეს სასამართლოში.
ტრამპი ამ ტარიფებს ამართლებდა საერთაშორისო საგანგებო ეკონომიკური უფლებამოსილების აქტით, რომელიც პრეზიდენტს აძლევს უფლებას, იმოქმედოს „საგანგებო“ საფრთხეების წინააღმდეგ.
ტრამპმა ვაჭრობაში საგანგებო მდგომარეობა გამოაცხადა და ამტკიცებდა, რომ სავაჭრო დისბალანსი აშშ-ის ეროვნული უსაფრთხოებისთვის საზიანოა. თუმცა სასამართლომ დაადგინა, რომ ტარიფების დაწესება არ შედის პრეზიდენტის მანდატში და ეს არის „კონგრესის ძირითადი უფლება“.
