როცა ამბობენ, მოხსენით ყადაღა, უნდა თქვან, რომ ჩვენ, ევროკავშირმა მივეცით 15 მილიონი არასამთავრობო ორგანიზაციებს და არცერთი თეთრი არ დახარჯულა დესტრუქციული მოქმედებისთვის -თენგიზ შარმანაშვილი
როცა ამბობენ, მოხსენით ყადაღა, უნდა თქვან, რომ ჩვენ, ევროკავშირმა მივეცით 15 მილიონი არასამთავრობო ორგანიზაციებს და არცერთი თეთრი არ დახარჯულა დესტრუქციული მოქმედებისთვის, – ამის შესახებ საპარლამენტო უმრავლესობის წევრმა, თენგიზ შარმანაშვილმა განაცხადა.
შარმანაშვილმა კომენტარი გააკეთა საგარეო და უსაფრთხოების პოლიტიკის საკითხებში ევროკავშირის პრესსპიკერის გუშინდელ განცხადებაზე, რომელშიც ევროკავშირი საქართველოს ხელისუფლებას მოუწოდებს, დაუყოვნებლივ შეცვალოს გადაწყვეტილება დამოუკიდებელი სამოქალაქო ორგანიზაციების საბანკო ანგარიშების გაყინვის შესახებ.
როგორც შარმანაშვილი აღნიშნავს, მიუღებელია ორმაგი სტანდარტები.
„ჩვენთვის ორმაგი სტანდარტების პოლიტიკა მიუღებელია და ამას ვერ ავყვებით. არცერთ სიტყვას არ ამბობენ იმის თაობაზე, რომ ტყუილია, რომ ეს არასამთავრობო ორგანიზაციები ფულს ხარჯავდნენ საქართველოში რევოლუციური სიტუაციების შესაქმნელად. ჩვენ კონკრეტულ შედეგებში ვდებთ ბრალს და ვუთითებთ, რომ ეს ფული არალეგიტიმურად გამოიყენებოდა საქართველოში. არცერთი გამაბათილებელი მტკიცებულება არ მოჰყავთ და უბრალოდ დეკლარირებას ახდენენ, რომ მოხსენით ეს ყადაღა. ეს რომ თქვან, რომ მოხსენით ყადაღა, მაშინ უნდა თქვან, რომ ჩვენ, ევროკავშირმა მივეცით 5-10-15 მილიონი არასამთავრობო ორგანიზაციებს და 15-ვე მილიონი დაიხარჯა ამისთვის და არცერთი თეთრი არ დახარჯულა დესტრუქციული და არალეგიტიმური მოქმედებისთვის, შესაბამისად, გააუქმეთ ეს კანონი და ამას არ აკეთებს“, – განაცხადა შარმანაშვილმა.
ცნობისთვის, პროკურატურაში მიმდინარე გამოძიების ფარგლებში 27 აგვისტოს რამდენიმე არასამთავრობო ორგანიზაციის საბანკო ანგარიშებს ყადაღა დაედო. პროკურატურის განმარტებით, აღნიშნული არასამთავრობო ორგანიზაციების საქმიანობა გასცდა მათივე წესდებით განსაზღვრულ მიზნებს და მიღებული ფინანსების მნიშვნელოვანი ნაწილი მოახმარეს კანონსაწინააღმდეგო ქმედებებს
