ევროკავშირმა, შესაძლოა, განიხილოს რუსული გათხევადებული ბუნებრივი აირის იმპორტის ამერიკული ბუნებრივი აირით ჩანაცვლების საკითხი-ურსულა ფონ დერ ლაიენი
ევროკავშირმა, შესაძლოა, განიხილოს რუსული გათხევადებული ბუნებრივი აირის იმპორტის ამერიკული ბუნებრივი აირით ჩანაცვლების საკითხი, – ამის შესახებ ევროკომისიის პრეზიდენტმა, ურსულა ფონ დერ ლაიენმა განაცხადა.
ევროკავშირის აღმასრულებელი ორგანოს ხელმძღვანელის თქმით, შეერთებული შტატები ევროპის ყველაზე დიდი ეკონომიკური და სავაჭრო პარტნიორია და მნიშვნელოვანია თავიდანვე კარგი ურთიერთობების დამყარება ახალ ადმინისტრაციასთან.
„ასე გავაგრძელებთ პოზიტიური ტრანსატლანტიკური დღის წესრიგის ფორმირებას. ძალიან მნიშვნელოვანია ის, რაც გუშინ დავიწყეთ; მეორეც, ვიმსჯელოთ საერთო ინტერესებზე – და არის საერთო ინტერესები, რაც გვაქვს – და შემდეგ გადავიდეთ მოლაპარაკებებზე. საერთო ინტერესებია, მაგალითად, ეს არის ერთი თემა, რომელსაც შევეხეთ, არ ვიტყოდი, რომ განვიხილეთ, მაგრამ გუშინ შევეხეთ, ეს გათხევადებული ბუნებრივი აირის თემაა. ჩვენ კვლავ ვიღებთ უამრავ გათხევადებულ ბუნებრივ აირს რუსეთიდან და რატომ არ შევცვალოთ იგი ამერიკული გათხევადებული ბუნებრივი აირით, რომელიც უფრო იაფია ჩვენთვის და ამცირებს ჩვენს ენერგეტიკულ ხარჯებს? ეს არის ის, სადაც ჩვენ შეგვიძლია შევიდეთ დისკუსიაში; ასევე, შეგვიძლია, ვიმსჯელოთ, თუ რა არის ჩვენი სავაჭრო დეფიციტი“, – განაცხადა ურსულა ფონ დერ ლაიენმა.
