აუცილებელია, ქართული საზოგადოებრივ-პოლიტიკური სივრცე გაიწმინდოს აგენტურისგან და დამნაშავეებისგან – “ერთიანი ნეიტრალური საქართველო”

თითოეულმა ამომრჩეველმა უნდა გაიაზროს, რომ უცხო ქვეყნების აგენტების, მოღალატეების მხარდაჭერა სცდება პოლიტიკური სიმპათია-ანტიპათიის ფარგლებს და მათთვის ხმის მიცემა ასევე გახდება პასუხისმგებლობის საფუძველი, – ამის შესახებ „ერთიანი ნეიტრალური საქართველოს“ განცხადებაშია ნათქვამი.
მათივე განცხადებით, აუცილებელია, ქართული საზოგადოებრივ-პოლიტიკური სივრცე გაიწმინდოს აგენტურისგან და დამნაშავეებისგან.
„15 სექტემბერს ჩვენ მიერ გავრცელებულ განცხადებაში, რომელიც კოლექტიური „ნაცმოძრაობის“ ამომრჩეველთა პასუხისმგებლობას ეხებოდა, დეტალურად განვმარტეთ, რატომ არის აგენტურული ქსელის ორი წარმომადგენელი − გახარია-ხაზარაძე უშუალოდ „ნაცმოძრაობის“ დანაყოფებზე არანაკლებ საშიში ჩვენი ქვეყნისთვის. ეს აღინიშნა „ქართული ოცნების“ საპატიო თავმჯდომარის, ბიძინა ივანიშვილის ინტერვიუშიც, სადაც მან საკუთარი გუნდის ყოფილ წევრზე განაცხადა, რომ გახარია პრემიერ-მინისტრის თანამდებობიდან უცხო ქვეყნების ინტერესებს ემსახურებოდა და მისი გადადგომაც სწორედ გარედან მიღებული დავალება იყო, რათა ხელისუფლება ჩამოშლილიყო და ძალაუფლება კოლექტიურ „ნაცმოძრაობას“ აეღო ხელში.
ივანიშვილმა გახარიას სამომავლო პასუხისმგებლობის დაყენების შესახებაც გააკეთა განცხადება და სწორად მიანიშნა, რომ ქვეყნის ღალატი უნდა იყოს დასჯადი. სააკაშვილის ხელისუფლებამ სამშობლოს ღალატის მუხლი სისხლის სამართლის კოდექსიდან სწორედ იმიტომ ამოიღო, რომ მომავალში ამ მუხლით თვითონ არ გასამართლებულიყო, ხოლო უკანა რიცხვით ამ მუხლით მისი გასამართლება ვეღარ მოხერხდებოდა. მიგვაჩნია, რომ ქვეყნის ღალატი არ უნდა იყოს მხოლოდ პოლიტიკური შეფასების საგანი და ერთხელ და სამუდამოდ უნდა შეიქმნას პრეცედენტი, რომ ასეთი მძიმე დანაშაული ისჯება!
ამასთან, თითოეულმა ამომრჩეველმა უნდა გაიაზროს, რომ უცხო ქვეყნების აგენტების, მოღალატეების მხარდაჭერა სცდება პოლიტიკური სიმპათია-ანტიპათიის ფარგლებს და მათთვის ხმის მიცემა ასევე გახდება პასუხისმგებლობის საფუძველი.
რაც უნდა ეცადოს გახარია, საკუთარი თავი გამიჯნოს კოლექტიური „ნაცმოძრაობისგან“, ფაქტები სხვა რეალობას აჩვენებენ. წარსულს რომ აღარ შევეხოთ, საკმარისია გავიხსენოთ ე.წ. ქარტია, რომელსაც კრებსითი „ნაცმოძრაობის“ სხვა დანაყოფებთან ერთად გახარია-ხაზარაძეც აწერენ ხელს. ე.წ. ქარტია კი სხვა არაფერია, თუ არა სახელმწიფო ინსტიტუტების მიტაცების გეგმა აგენტურული ქსელის მიერ. აღნიშნული დოკუმენტის თითოეული პუნქტი ქვეყნის გარედან არის ნაკარნახევი და საკუთარი შინაარსით საქართველოს სუვერენიტეტის, მშვიდობისა და სტაბილურობის წინააღმდეგაა მიმართული.
საქართველოს გრძელვადიანი მშვიდობის, სტაბილურობის და განვითარების უზრუნველყოფა მხოლოდ არჩევნებში „ქართული ოცნების“ გამარჯვებით ვერ მოხერხდება. აუცილებელია, ქართული საზოგადოებრივ-პოლიტიკური სივრცე გაიწმინდოს აგენტურისგან და დამნაშავეებისგან. ასევე, მიუხედავად მკაფიო მტკიცებულებების არსებობისა, თუ მოქალაქე კვლავ გადაწყვეტს დამნაშავეების მხარდაჭერას და ამით მათთვის დანაშაულის ჩასადენად „იარაღის გადაცემას“, ცხადია, უნდა დადგეს თითოეული მათგანის პასუხისმგებლობის საკითხი.
მხოლოდ ასე შევძლებთ საბოლოოდ გავთავისუფლდეთ შიდა პოლიტიკაზე საქართველოს მტრული ძალების გავლენისგან. მხოლოდ ასე შევძლებთ დავაზღვიოთ რისკი, რომ ადრე თუ გვიან ქვეყნის გარედან კვლავ მოახერხებენ აგენტურის ხელისუფლებაში დაბრუნებას, რაც საქართველოს სუვერენიტეტის გაუქმებას, ლგბტ იდეოლოგიის დაკანონებას და ქვეყნის ომში ჩართვას გამოიწვევს“, – ნათქვამია „ერთიანი ნეიტრალური საქართველოს“ განცხადებაში.