![პროვოკაციის წყურვილი იმდენად დიდი იყო, პირველად ვნახეთ შემთხვევა, როდესაც აქცია ცდილობს სხვისი ტრიბუნა დაიკავოს -ირაკლი ქადაგიშვილი](https://gttv.ge/wp-content/uploads/2024/04/irakli-qadagishvili.jpg)
პროვოკაციის წყურვილი იმდენად დიდი იყო, პირველად ვნახეთ შემთხვევა, როდესაც აქცია ცდილობს სხვისი ტრიბუნა დაიკავოს -ირაკლი ქადაგიშვილი
„მიტინგების დაახლოებით 40-წლიანი გამოცდილება მაქვს და პროვოკაციის წყურვილი იმდენად დიდი იყო, პირველად ვნახეთ შემთხვევა, როდესაც აქცია ცდილობს სხვისი ტრიბუნა დაიკავოს, – ამის შესახებ პარლამენტის საპროცედურო საკითხთა კომიტეტის თავმჯდომარემ, ირაკლი ქადაგიშვილმა განაცხადა.
მისივე თქმით, აქციის ორგანიზატორები პროვოკაციის მოწყობით ცდილობდნენ მუხტის შენარჩუნებას.
„ეს არც აქციის წესში ჯდება და არც ზოგადად ქცევის წესში. მიზეზი იყო ის, რომ დაინახეს, აქცია ვერანაირ ლოგიკურ მიზანს ვერ აღწევდა, აქედან გამომდინარე, იფიქრეს პროვოკაციის მოწყობა. პროვოკაცია მათთვის მნიშვნელოვანი იყო, რადგან მუხტს სხვანაირად ვერ ინარჩუნებენ. პროვოკაცია, დაპირისპირება, პოლიციის გამოწვევა, კონფლიქტის გამოწვევა არის მათი მიზანი. აქ რამდენიმე საკითხი მუშაობს. ერთი კონკრეტულად ის საკითხი, რომ საქართველოსთან დაკავშირებით გამწვავებულმა აქციამ ხალხში გამოიწვიოს მღელვარება, საერთაშორისო შეფასებები დამძიმდეს ამასთან დაკავშირებით და ყველაზე მნიშვნელოვანი, ამ ადამიანებს აქვთ ქვეცნობიერი კომპლექსი და უნდათ, რომ 7 ნოემბერი და 26 მაისი რამენაირად განმეორდეს საქართველოში. უპირველესად, ციფრებით აპელირებას ნუ ეცდებით, იმიტომ, რომ საბოლოო ჯამში, დაუმონტაჟებელი სურათის დათვლა ტექნიკური თვალსაზრისით არის ძალიან ადვილი. ამას ჩვენ სპეციალურად არ ვაკეთებთ. აქედან გამომდინარე, მაგ ციფრებით ასე ადვილად ნუ აპელირებთ. ამ ციფრებით თქვენ მანიპულირებთ ადამიანებით“, -აღნიშნა ირაკლი ქადაგიშვილმა.
ირაკლი ქადაგიშვილს ჟურნალისტმა კითხვა დაუსვა, ესმის თუ არა იმ ადამიანების ხმა, ვინც გუშინდელ აქციაზე იდგა.
„გავიმეორებ, რომ ციფრებით მანიპულირებას თუ თავს დაანებებთ, იქნება ძალიან კარგი, რადგან ძალიან მძიმე დღეში ჩავარდებით მანიპულირებით. მოგიწევთ თქმა, რომ დღეს მილიონი კაცი იყოო, როგორც თქვენ ციფრებს ახსენებთ. ახლა მეორე – ჩვენ ყოველთვის ვისმენთ საზოგადოების ხმას და ერთი ღონისძიება და ერთი მიტინგი, არ არის მთელი საზოგადოების ხმა, – განაცხადა ირაკლი ქადაგიშვილმა.
გუშინ ღამით პარლამენტთან მიმდინარე საპროტესტო აქციის მონაწილეებმა საკანონმდებლო ორგანოს წინ „ქართული ოცნების“ მიერ 29 აპრილს დააანონსებულ შეკრებასთან დაკავშირებით დამონტაჟებულ სცენასთან მისვლა სცადეს.