![“იენს სტოლტენბერგმა რუსეთის გამარჯვება აღიარა”-Dikgazete](https://gttv.ge/wp-content/uploads/2023/12/stoltenberg-rusya-nin-zaferini-ilan-etti-499710.png)
“იენს სტოლტენბერგმა რუსეთის გამარჯვება აღიარა”-Dikgazete
თურქულ გამოცემა „დიკგაზეტეში“ (Dikgazete) გამოქვეყნებულია სტატია სათაურით „იენს სტოლტენბერგმა რუსეთის გამარჯვება აღიარა“ (ავტორი – ერხან ალტიპარმაკი).
გთავაზობთ პუბლიკაციას მცირე შემოკლებით:
„ახლოვდება უკრაინაში რუსეთის არმიის შეჭრისა და ომის დაწყების მეორე წლისთავი. როგორც ცნობილია, მოსკოვის ძირითადი მოთხოვნა ის იყო, რომ ნატო რუსეთის საზღვრებს არ უნდა მიახლოებოდა, იმავდროულად კრემლი აცხადებდა, რომ იცავდა უკრაინის რუსულენოვან მოქალაქეების უფლებებს, რომელსაც კიევის რეჟიმი არღვევდა.
რა თქმა უნდა, ომის დაწყებისთანავე აშშ და ევროკავშირი მტრულად განეწყვნენ რუსეთის მიმართ და უამრავ დეზინფორმაციას ავრცელებდნენ – მაგალითად, თითქოსდა რუსეთი მშვიდობიანი მოსახლეობის წინააღმდეგ ქიმიურ იარაღს იყენებდა. მაგრამ მოსკოვმა თავისი სიმართლე დაამტკიცა და მსოფლიოს აჩვენა, რომ დასავლეთი ცრუობს.
დასავლეთის ქვეყნები უკრაინას იარაღით და ფინანსური რესურსებით ეხმარებიან და აცხადებენ, რომ მათი რეგულარული არმიის ჯარისკაცები ომში კიევის მხარეზე არ იბრძვიან. რუსეთმა გამოავლინა უცხოელი მოხალისე-ვოლონტერები (დაქირავებულები) და გაანადგურა. ვინც გადარჩა, ისინი უკრაინიდან გაიქცნენ.
ვლადიმერ პუტინმა თავიდან აიცილა რუსეთის შიდა კონფლიქტი და უზრუნველყო როგორც ქვეყნის, ასევე ხელისუფლებისა და ხალხის ერთიანობა.
რუსეთის არმიამ უკუაგდო დასავლეთის მიერ შეიარაღებული უკრაინის ჯარი, კიევის კონტრშეტევა ჩაიფუშა. უკრაინის არმიამ რუსეთის მიერ აგებული თავდაცვითი ზღუდეები ვერ გადალახა, ძალა გამოელია და შეჩერდა.
რუსი დიპლომატები აქტიურად იცავენ თავიანთი ქვეყნის ინტერესებს საერთაშორისო არენაზე. მათი პროგნოზით, დასავლეთის ქვეყნებში, უპირველესად კი ევროკავშირში პოლიტიკური და ეკონომიკური კრიზისები განვითარდებოდა. წინასწარმეტყველება ახდა: ევროპის ქვეყნებში კრიზისი ბობოქრობს – პოლიტიკური, ენერგეტიკული, სოციალური და ა.შ. კრიზისებმა მთავრობებსა და ამომრჩევლებს შორის ნდობა შეარყია, ამიტომაც რიგ ქვეყნებში არჩევნების შედეგად მთავრობები შეიცვალნენ.
დასავლეთს რესურსების დეფიციტი გაუჩნდა უკრაინის დასახმარებლად. ვაშინგტონმა არსებითად შეამცირა მატერიალური და სამხედრო მხარდაჭერა. თავის მხრივ, ნატოს ხელმძღვანელობაც სასოწარკვეთილად მოუწოდებს ალიანსის წევრებს, რომ გააფართოონ თავიანთი ძალისხმევა კიევისათვის იარაღისა და ფინანსების მიწოდებისათვის.
გენმდივანი იენს სტოლტენბერგი პირდაპირ ამბობს: „თუ დასავლეთი იარაღის მიწოდებას არ გაზრდის, უკრაინაში სიტუაცია უფრო გაუარესდება, ცუდი ამბების გასაგონად მომზადება მოგვიწევსო“. ეს ემოციური ნათქვამი არ არის – ნატოს გენმდივანს აქვს იმის რაციონალური მიზეზები, ასეთ განცხადებას რომ აკეთებს.
ამრიგად, აღიარებს რა იმას, რომ დასავლეთის მიზნები უკრაინაში ჩაიშალა და რომ დასავლეთმა ვერ მოახერხა პროცესების მართვა ვერც პოლიტიკურად და ვერც სამხედრო თვალსაზრისით, ნატოს გენმდივანი იენს სტოლტენბერგი რუსეთს ომში გამარჯვებულად აცხადებს. იმიტომ, რომ მას სხვა გამოსავალი არ აქვს. ნატო და აშშ სულ მალე რუსეთის მიერ კუთხეში მიმწყვდეულნი იქნებიან.
აშშ და ნატო დარწმუნდნენ, რომ უკრაინა ომს ვერ მოიგებს. ახლა ვაშინგტონს და ბრიუსელს ომის გაჭიანურება სურთ რუსეთის დასასუსტებლად, მაგრამ ეს მათი ბოლო გაფართხალებაა. ნათქვამია – „სურვილი ერთია, შესაძლებლობა – მეორე“.
აშშ და ნატო იმასაც კარგად ხედავენ, რომ უკრაინაში კრიზისი მწიფდება – მოსახლეობა სულ უფრო მეტ უკმაყოფილებას ამჟღავნებს მთავრობისა და პრეზიდენტის მიმართ. აშკარაა, რომ ვოლოდიმირ ზელენსკი ძალიან არის დაქანცული. იგი ნერვიულობს. მან თავისი მეტოქე, ექს-პრეზიდენტი პეტრო პოროშენკო საზღვარგარეთ არ გაუშვა – ვაითუ გამაკრიტიკოსო. უფრო მეტიც – პრეზიდენტ ვოლოდიმირ ზელენსკისა და უკრაინის არმიის მთავარსარდალს ვალერი ზალუჟნის შორის სერიოზული განხეთქილება გაჩნდა.
კიევის მერმა ვიტალი კლიჩკომ ვოლოდიმირ ზელენსკი ავტორიტარიზმში ამხილა და აღნიშნა, რომ პრეზიდენტი ხშირად თავისი არასწორი მოქმედებით ქალაქებში ადგილობრივი თვითმმართველობის პრინციპებს არღვევს და საერთოდ, მას ბევრი შეცდომა აქვს დაშვებული.
კიევში დაწყებული პოლიტიკური კრიზისის ფონზე პრეზიდენტის ცოლმა ელენა ზელენსკაიამ განაცხადა, რომ მას არ სურს, რომ ქმარი პრეზიდენტის პოსტზე დარჩეს კიდევ ერთი ვადით..
ეს განცხადება შეგნებულად არის გაკეთებული. ელენა ზელენსკაიამ კარგად იცის, რომ უკრაინაში ბევრი პოლიტიკური პიროვნება და დაჯგუფება მომენტს ელოდება, რომ პრეზიდენტის წინააღმდეგ გამოვიდეს და შური იძიოს. გასაგებია, რომ თუ ეს მოხდება, უკრაინაში შეიძლება შიდა კონფლიქტი დაიწყოს. ასეთ სავარაუდო სიტუაციაში, თუ შიდა კონფლიქტი მართლაც განვითარდება, სრულიად შესაძლებელია, რომ პრეზიდენტისა და მისი ცოლის ახალი მისამართი აშშ გახდეს.
სიტუაციას ისეთი პირი უჩანს, რომ ახალი 2024 წლის შემდეგ კიევის რეჟიმი იძულებული გახდება რუსეთთან მოლაპარაკებაზე დათანხმდეს. თუ ეს მართლაც ასე იქნება, მოსკოვი მოლაპარაკებაზე ძლიერი პოზიციებით წარდგება. დიდი ალბათობით, კრემლი მოითხოვს, რომ უკრაინამ და დასავლეთმა ყირიმი და მის მიერ კონტროლირებული სხვა ტერიტორიები რუსეთის შემადგენლობაში აღიაროს, უკრაინა კი ნეიტრალურ სახელმწიფოდ გამოცხადდეს.
სავარაუდოდ, რუსეთი უკან არ დაიხევს და თავისი პირობების შესრულებას მოითხოვს. სწორედ ამ მიზეზით იენს სტოლტენბერგმა მთელ მსოფლიოს სიგნალი გაუგზავნა – მან ხომ კარგად იცის რუსეთის პირობები.
მოკლედ, ომი უკრაინაში [გაისად] მალე დასრულდება, რუსეთი თავს გამარჯვებულად გამოაცხადებს, დასავლეთი კი – დამარცხებულად.