საქართველოს როლი დღითიდღე იზრდება რეგიონული უსაფრთხოების, მშვიდობის უზრუნველყოფის, ასევე ენერგეტიკული, ეკონომიკური თუ სხვა მიმართულებით -რატი იონათამიშვილი
დღითიდღე იზრდება საქართველოს მასშტაბური როლი, როგორც რეგიონული უსაფრთხოებისა და მშვიდობის უზრუნველყოფის, ასევე ენერგეტიკული, ეკონომიკური თუ სხვა მიმართულების საკითხებში, მათ შორის დასავლური ქვეყნებისა და აზიის ქვეყნების ჭრილში, – ამის შესახებ ფრაქცია „ქართული ოცნების“ თავმჯდომარის მოადგილემ, რატი იონათამიშვილმა განაცხადა.
მისივე თქმით, ასევე მნიშვნელოვანია შუა დერეფნის პოტენციალის კიდევ უფრო გაღრმავება.
„ევროპიდან და აზიიდან მნიშვნელოვანი აქტორები „თბილისის აბრეშუმის გზის ფორუმზე“ მსჯელობდნენ სწორედ განვითარებაზე და ამ განვითარებაში არ იგულისხმება მხოლოდ ჩვენი რეგიონი, არამედ ყველა ის დამაკავშირებელი ქვეყანა, რომელიც ამ შუა დერეფნის პოტენციალისთვის იქნება ბენეფიციარი. შესაბამისად, ეს არის დამსახურება სწორედ იმ სწორი პოლიტიკის, ეკონომიკური პოლიტიკის, უსაფრთხოების უზრუნველყოფის, რომელსაც ჩვენი ხელისუფლება ახორციელებს“, – განაცხადა რატი იონათამიშვილმა.
