„რესპუბლიკელი“ სენატორებისა და კონგრესმენების ჯგუფი ბაიდენს მოუწოდებს, შეწყვიტოს უკრაინის დახმარება

რესპუბლიკელმა სენატორებმა და წარმომადგენლობითი პალატის წევრებმა აშშ-ის პრეზიდენტს, ჯო ბაიდენს წერილით მიმართეს, არსებულ ფორმატში უკრაინისადმი დახმარება შეაჩეროს.

წერილს ხელს აწერს 20 კონგრესმენი.

„ომის მეორე წელი დაიწყო, მაგრამ დასასრულის პროგნოზირება შეუძლებელია. მარიონეტული ომი რუსეთთან უკრაინაში არ შედის შეერთებული შტატების ინტერესებში და ესკალაციის საფრთხეს ქმნის, რომელიც შეიძლება, უკონტროლო გახდეს“, – ნათქვამია წერილში.

სენატორებისა და წარმომადგენლობითი პალატის წევრების აზრით, ბაიდენის ადმინისტრაციის არსებული სტრატეგია – მუდმივი დახმარება და სანქციები – მეტ ესკალაციას, ძალადობას უწყობს ხელს და ზრდის რუსეთთან პირდაპირი დაპირისპირების საფრთხეს. მათ ასევე გააკრიტიკეს „ჰაიმარსების“ უკრაინაში გაგზავნის გადაწყვეტილება და ამ გადაწყვეტილებას სერიოზულ პროვოკაციად აღიქვამენ.

როგორც წერილის ხელმომწერები აღნიშნავენ, ნატო-სთან „მარიონეტული ომის წარმოებისას“ მოსკოვის მოთმინება, შესაძლოა, ნებისმიერ მომენტში ამოიწუროს, ხოლო უკრაინაზე რუსეთის თავდასხმა იმის აშკარა მტკიცებულებაა, რომ პუტინი მზადაა ძალის გამოყენებისთვის.

ხელმომწერები ასევე აცხადებენ, რომ შეერთებული შტატები ძალიან დიდ ფულს ხარჯავს უკრაინის ინტერესებისთვის, რომლის მთავრობაც „ისტორიულად ჩაფლულია კორუფციაში“ იმ ფონზე, როდესაც შეერთებულ შტატებს საკმარისი შიდა პრობლემები აქვს. გარდა ამისა, სენატორები და წარმომადგენლობითი პალატის წევრები ამტკიცებენ, რომ ასეთი მასშტაბური დახმარება ზიანს აყენებს ამერიკული არმიის საბრძოლო მზადყოფნას. მათ ასევე მიაჩნიათ, რომ უკრაინის მიმართ ვაშინგტონის მხარდაჭერა ხელს უწყობს რუსეთისა და ჩინეთის დაახლოებას, რაც დამატებითი საფრთხეა.