“უნდა დატოვოთ პარლამენტი… ეს დაძაბავს სიტუაციას” – გიორგი მარგვლაშვილი ოპოზიციას
საქართველოს ყოფილი პრეზიდენტი გიორგი მარგველაშვილი ოპოზიციას პარლამენტის დატოვებისკენ მოუწოდებს.
მისი თქმით, ოპოზიციის პარლამენტში ყოფნა იმ ძალის ხელშეწყობაა, რომელსაც ქვეყანა ავტორიტარიზმიდან ტოტალიტარიზმისაკენ მიყავს.
ყოფილი პრეზიდენტისთვის მიუღებელია დასავლელი პარტნიორების პოზიციაც, რომლებიც ოპოზიციას მმართველ ძალასთან თანამშრომლობისა და არარეალურ “12 პუნქტზე“ მუშაობისკენ მოუწოდებენ.
“ძალიან სუსტი მდგომარეობა ქართული ოპოზიციის გამოიხატება იმაში, რომ ამ სისტემას, რომელიც მიიღწვის, გააღრმავოს ეს ავტორიტარიზმი და გადაიყვანოს ტოტალიტარიზმში, სისტემას, რომელმაც ძალიან მკაფიოდ თქვა უარი საქართველოს ისტორიულ და დასავლურ არჩევანზე, აძლევს “გაპრავების” საშუალებას.
იგივეს აკეთებენ ჩვენი პარტნიორები, რომლებიც ოპოზიციას ეუბნებიან “იჯექით პარლამენტში, ოღონდ ნუ იქნება დაძაბულობა, და ნუ იქნება არეულობა“, ეს ელჩები 3-4 წელიწადში წავლენ თავიანთ დემოკრატიულ ქვეყნებში, აქ კი ეს სტაბილურობა გადაიქცევა იმად, რასაც ჩვენ ვხედავთ ქვეყნებში, სადაც დემოკრატიის სრული ნიველირება ხდება“, – განაცხადა მარგველაშვილმა.
მისი თქმით, ოპოზიცია უნდა გამოვიდეს პარლამენტიდან და თავი სათქმელი ადამიანებს ქუჩიდან უნდა უთხრას.
„ნებისმიერი ნაბიჯი, რომელიც თანამშრომლობაზე იტყვის უარს, მოახდენს ხელისუფლების ლუსტრაციას, გამოიყვანს ოპოზიციას პარლამენტიდან და დაძაბავს სიტუაციას, არის პოზიტიური და მისაღები. უნდა იმოქმედოთ.
პირველ რიგში, უნდა დატოვოთ პარლამენტი. ეს არ გადაწყვეტს სიტუაციას, მაგრამ ეს დაძაბავს სიტუაციას და მოახდენს ლუსტრაციას. ჩვენი დასავლელი პარტნიორები, რომლისგანაც 24 საათიან ლანძღვას ვიგებთ ჩვენს ხელისუფლებაზე, ამ ნაბიჯში წამოგყვებიან” – განაცხადა გიორგი მარგველაშვილმა „ტვ პირველის” ეთერში.
