ტყუილებით სავსე რეზოლუციით, ევროპარლამენტი საკუთარი თავის დისკრედიტაციას ახდენს-ლევან მახაშვილი
ევროპარლამენტის რეზოლუცია დეზინფორმაციას, არაერთ ტყუილს შეიცავს. ტყუილებით სავსე რეზოლუციების მიღებით ევროპარლამენტი საკუთარი თავის დისკრედიტაციას ახდენს, – ამის შესახებ პარლამენტის ევროპასთან ინტეგრაციის კომიტეტის თავმჯდომარემ, ლევან მახაშვილმა განაცხადა.
მისი თქმით, „ქართული ოცნებისთვის“ ფასი ვერ ექნება ისეთ დოკუმენტს, რომლის მიხედვით, საქართველოს მოსახლეობის არჩევანს ჩალის ფასი აქვს.
„ევროპარლამენტის კიდევ ერთი რეზოლუცია – ცარიელი ქაღალდი, ცარიელი სიტყვებია, რომელსაც არანაირი ფასი არ აქვს. ფასი და სამართლებრივი ძალა არ აქვს თავად ევროკავშირისთვის, რადგან შესასრულებლად სავალდებულო არ არის. ლოგიკურია, ჩვენთვის ფასი ვერ ექნება ისეთ დოკუმენტს, რომლის მიხედვით, საქართველოს მოსახლეობის არჩევანს ჩალის ფასი აქვს, რა თქმა უნდა, ჩვენ ამ დოკუმენტს სერიოზულად არ აღვიქვამთ“, – განაცხადა ლევან მახაშვილმა.
მისი თქმით, დოკუმენტი შეიცვას დეზინფორმაციას, არაერთ ტყუილს.
„საქართველოს ხელისუფლებასა და, ზოგადად, საქართველოზე არის უსამართლო შეტევა. თავად ევროკავშირისა და ევროპის ინსტიტუტებმა არაერთხელ ამხილეს ტყუილში ევროპარლამენტის რეზოლუციები. ტყუილებით სავსე რეზოლუციების მიღებით ევროპარლამენტი საკუთარი თავის დისკრედიტაციას ახდენს. ამ დოკუმენტს ჩვენთვის ფასი არა აქვს. რეზოლუციაში არაერთი სახელი ვნახეთ, ეს არის იერიში ადამიანებზე, რომლებიც ემსახურებიან სიმართლეს და მათზე იერიშის მიტანას ამიტომ ცდილობენ. გაილაშქრეს კონკრეტულ მედიაორგანიზაციებზე, რომლებიც მათ იდეოლოგიას არ ემსახურებიან და პირიქით, სიცრუესა და დეზინფორმაციაში ამხელენ“, – განაცხადა ლევან მახაშვილმა.
მისი თქმით, რეზოლუციასთან დაკავშირებით ოპოზიციის რეაქცია იმის დადასტურებაა, თუ როგორ უხარიათ სახელმწიფოს წინააღმდეგ შეტევა და შტურმი.
„მათ მიერ გადადგმული ნაბიჯები, დიდი ხანია, პარტიულ-პოლიტიკურ საქმიანობას გასცდა და არის პირდაპირ სახელმწიფოზე შეტევის ანატომია. ქვეყნისთვის სასარგებლო საქმეს – ვიზალიბერალიზაციას თუ ნებისმიერ სხვა მიღწევას როდესაც უტევ, საკუთარი სახელმწიფოს და მოსახლეობის წინააღმდეგ იბრძვი“, – აღნიშნა ლევან მახაშვილმა.
