“პუტინი თურქეთში ჩასვლაზე უარს თუ იტყვის, ეს იქნება საბოლოო სიგნალი, რომ მოსკოვს ომის დასრულება არ სურს” – ერმაკი

უკრაინის პრეზიდენტის ადმინისტრაციის ხელმძღვანელმა, ანდრეი ერმაკმა განაცხადა, რომ ვლადიმერ პუტინი თურქეთში ჩასვლაზე უარს თუ იტყვის, ეს იქნება რუსეთის მიერ ომის დასრულების სურვილის არქონის საბოლოო სიგნალი.

ანდრეი ერმაკის თქმით, ამ დროისთვის რუსეთს არანაირი პასუხი არ გაუცია ვლადიმერ პუტინის თურქეთში მოლაპარაკებებში მონაწილეობასთან დაკავშირებით. კიევმა კი დაადასტურა, რომ პრეზიდენტი ვოლოდიმირ ზელენსკი მზადაა და თურქეთში ჩავა.

ანდრეი ერმაკმა დასძინა, რომ 12 მაისს პრეზიდენტ დონალდ ტრამპისგან „ძალიან ძლიერი და მკაფიო“ განცხადება გაკეთდა, რომ თურქეთში ორივე ლიდერის დასწრებას ელოდება.

„მჯერა, რომ ვლადიმერ პუტინი თუ უარს იტყვის თურქეთში ჩასვლაზე, ეს იქნება საბოლოო სიგნალი, რომ რუსეთს არ სურს ამ ომის დასრულება, რომ რუსეთს არ სურს, არ არის მზად რაიმე მოლაპარაკებებისთვის“, – განაცხადა პრეზიდენტის ადმინისტრაციის ხელმძღვანელმა.