პროკურორის განცხადებით, 10-წუთიან აუდიოჩანაწერს, რომელიც ბაჩიაშვილის დაცვის მხარეს, როგორც ბაჩიაშვილ-ივანიშვილის საუბრის ჩანაწერი ისე აქვს წარმოდგენილი, 114-ჯერ აქვს წყვეტის კვალი
ბიძინა ივანიშვილსა და გიორგი ბაჩიაშვილს შორის არსებული დავის საქმის პროკურორის, მიხეილ სადრაძის განმარტებით, 10-წუთიან აუდიოჩანაწერს, რომელიც დაცვის მხარეს, როგორც ბაჩიაშვილ-ივანიშვილის საუბრის ჩანაწერი ისე აქვს წარმოდგენილი, 114-ჯერ აქვს წყვეტის კვალი.
სწორედ ამ ჩანაწერის ფარგლებში დაიკითხა ლევან სამხარაულის სახელობის სასამართლო ექსპერტიზის ეროვნული ბიუროს ექსპერტი ასმათ მატუშევსკაია. ამასთან, სასამართლოში ჩვენება მისცა ეროვნული ბანკის პრეზიდენტმა ნათია თურნავამაც.
„დაიკითხნენ მოწმეები, რომლებმაც ცალსახად და პირდაპირ დაადასტურეს ის გარემოება, რასაც ჩვენ ბრალდებულს სამართლებრივად ვედავებით. ამ სისხლის სამართლის საქმეზე ძალიან ბევრი მოწმე დაიკითხა, ძალიან ბევრი დოკუმენტი იქნა გამოკვლეული, ეს მოწმეები არსებითი ხასიათის იყვნენ, ყველა ეს პირი ამ ურთიერთობაში ოფიციალურად მონაწილეობდა. აბსოლუტურად ყველა მათგანმა დაადასტურა, რომ ინვესტიცია დაზარალებულის მხრიდან იყო განხორციელებული. თავად ბრალდებულის ბიზნესპარტნიორსაც კი არ უთქვამს ირიბადაც კი, რომ მხოლოდ მისი იყო ბიზნესი, ამას მხოლოდ ბრალდებული აცხადებს და ამის დამადასტურებელი დოკუმენტი არ არსებობს.
საჯაროდ გავრცელებული ინფორმაცია ამ საკითხის მოკვლევის საფუძველს წარმოადგენდა, ხოლო ამის შემდეგ, დოკუმენტაცია გამოითხოვა ეროვნულმა ბანკმა, გაანალიზა და ამის შემდეგ დაადგინა[დარღვევა]. საჯაროობის კომპონენტი მხოლოდ და მხოლოდ საკითხით დაინტერესების საფუძველია.
როგორც ბრალდებულმა, ასევე დაზარალებულმა ინვესტიცია სესხის სახით განახორციელა, დოკუმენტებში, ეს ასეა. თუ ჩვენ გვაინტერესებს ამ დოკუმენტების მიღმა რა არსებობს და როგორ შეიძლება დაკვალიფიცირდეს, მათ შორის სამართლებრივად, ეროვნული ბანკის კონტექსტშიც, ის დაკვალიფიცირებულია დოკუმენტურად, შემოწმების ანალიზის საფუძველზე, ოფიციალური სამართლებრივი ურთიერთობების ფარგლებში, როგორც ინვესტიცია. განვმეორდები, ბრალდებულის ძლიერი მხარე საერთოდ არ არის დოკუმენტები, არც ერთ დოკუმენტზე ის ოფიციალურად საერთოდ არ ფიქსირდება იმ კომპანიასთან შემხებლობაში, რომელზეც საუბარია. უფრო მეტიც, მან სესხად როცა შეიტანა თანხა, პროცენტის სახით დაიბრუნა ეს თანხა”, – განაცხადა სადრაძემ.
რაც შეეხება ექსპერტის ჩვენებას, როგორც პროკურორი განმარტავს, ჩანაწერი, რომელიც ბაჩიაშვილს აქვს წარმოდგენილი, ავთენტური არ არის.
„ძალიან ცალსახად უნდა იყოს ხაზგასმული, რომ ექსპერტიზა გულისხმობს სპეციალური ცოდნის, გამოცდილების და სპეციალური პროგრამების, ტექნოლოგიების გამოყენებას, რომელიც ყველასთვის ხელმისაწვდომი არ არის. სწორედ ასეთი ტექნოლოგიების გამოყენებამ დაადასტურა, რომ დაახლოებით 10-წუთიან საუბარში, 114 წყვეტაა, ანუ ერთ წუთში 10-ზე მეტი წყვეტა ფიქსირდება, ეს იმდენად აშკარა დემონსტრაციაა, რომ მონტაჟია, მეტი დასაბუთებად რთულად წარმომიდგენია. უფრო მეტიც, თითქოს, ეს ავთენტური ჩანაწერია, ესეც გამორიცხულია, რადგან დეტალურად ისაუბრა ექსპერტმა, ავთენტურ ჩანაწერს, სწორად გაკეთებულ ასლს თავისი თავისებურებები აქვს და ის სპეციალურ ცოდნას არ საჭიროებს. 114 მხოლოდ და მხოლოდ წყვეტა არსებობდა, თორემ ამის გარდა, უამრავი იმპულსი, ხმების გადაფარვები, ჩახშობები და ა.შ. იყო. ეს წყვეტა არამხოლოდ საუბრის მიმდინარეობისას, ან საუბრის დასაწყისში ან დასასრულში, სიტყვებს შორისაც კი არის ეს წყვეტა. ზარებს შორის არსებული წყვეტაც არ არის ლოგიკური და ვერ გამართლდება, რადგან არ შეიძლება, თუ ზარი უწყვეტად მიმდინარეობს, მასში წყვეტა იყოს. იმის დაშვება, რომ ეს რამდენიმე ჩანაწერი, რამდენიმე მოწყობილობიდან განხორციელებული იყოს, ბუნებრივია, ლოგიკურია”,- განაცხადა სადრაძემ.
ცნობისთვის, გიორგი ბაჩიაშვილისთვის წარდგენილი ბრალდება 2017 წელს განხორციელებულ ქმედებას ეხება. კერძოდ, პროკურატურის ინფორმაციით, ბაჩიაშვილმა ინვესტორს ჩადებული ინვესტიციიდან მიღებული სრული მოგების სანაცვლოდ მხოლოდ 536 900 აშშ დოლარი გადასცა, ხოლო დარჩენილი ინვესტორის კუთვნილი 8986 ოდენობის ბიტკოინი მართლსაწინააღმდეგოდ მიითვისა, რომლის ღირებულებაც მისი მართლსაწინააღმდეგოდ დაუფლების პერიოდში 43 მილიონამდე აშშ დოლარს შეადგენდა.
გიორგი ბაჩიაშვილი წარდგენილ ბრალდებაში თავს დამნაშავედ არ მიიჩნევს.
მას აღკვეთის ღონისძიების სახით 2 500 000-ლარიანი გირაო აქვს შეფარდებული, ასევე დაწესებული აქვს დამატებითი შემზღუდავი ღონისძიებები.
აღნიშნული ქმედება 9-დან 12-წლამდე თავისუფლების აღკვეთას ითვალისწინებს.
