პრეზიდენტი იურიდიულ სკანდალში გაეხვია, სალომე ზურაბიშვილმა მთავრობას ვიზიტზე ნებართვა სთხოვა იმ მუხლით, რომელზეც ამბობდა, ნებართვა არ უნდა გაიცემოდესო -მდინარაძე
სალომე ზურაბიშვილმა მთავრობის ადმინისტრაციას ვიზიტზე ნებართვა სთხოვა იმ მუხლით, რომელზეც ამბობდა, რომ ნებართვა ამ მუხლით არ უნდა გაიცემოდესო, – ამის შესახებ საპარლამენტო უმრავლესობის ლიდერმა, „ქართული ოცნების“ აღმასრულებელმა მდივანმა, მამუკა მდინარაძემ მთავრობის მიერ პრეზიდენტისთვის ლიეტუვაში ვიზიტზე უარის შესახებ დასმული კითხვის საპასუხოდ განაცხადა.
მისივე თქმით, აღნიშნული ჩანაწერით აღიარეს, რომ სიცრუე იყო საკონსტიტუციო სასამართლოში დავა.
„პრეზიდენტი სასწაულ სკანდალში გაეხვია, იურიდიულ სკანდალი დავარქვათ ამას. იცით, რომელი მუხლით მიმართა ადმინისტრაციას? საქართველოს მთავრობის ადმინისტრაციას სალომე ზურაბიშვილმა ნებართვა სთხოვა იმ მუხლით, რომელზეც ამბობდა, ამ მუხით ნებართვა რა შუაშიაო, არ უნდა გაიცემოდესო. სხვა მუხლზე აპელირებდნენ საკონსტიტუციო სასამართლოში. ანუ, ის პუნქტი მიუთითა, რომელსაც არ აღიარებდნენ. ეს არ არის იმ მოქმედების დამრეგულირებელი, რომლითაც პრეზიდენტმა საზღვარგარეთ უნდა განახორციელოს ვიზიტებიო. ამ ერთი ჩანაწერით აღიარეს, რომ სიცრუე, ფეიკი იყო მთელი დავა საკონსტიტუციოში“, – აღნიშნა მდინარაძემ.
საქართველოს პრეზიდენტს, სალომე ზურაბიშვილს მიმდინარე წლის 10 აპრილიდან 12 აპრილის ჩათვლით ლიეტუვის რესპუბლიკაში სამუშაო ვიზიტზე მთავრობამ უარი უთხრა.
