“ორი უკრაინელი ქალის მკვლელობა: პროკურატურის საბრალდებო დასკვნა ცოლ-ქმრის წინააღმდეგ”-Deutsche Welle
გერმანულმა სამაუწყებლო კომპანიამ „დოიჩე ველემ“ (Deutsche Welle) თავის ვებ-გვერდზე 3 სექტემბერს გამოაქვეყნა სტატია სათაურით „ორი უკრაინელი ქალის მკვლელობა: პროკურატურის საბრალდებო დასკვნა ცოლ-ქმრის წინააღმდეგ“ (ავტორი – რომან სულიმა), რომელშიც გადმოცემულია 2024 წლის თებერვალში, ბადენ-ვიურტემბერგის მხარეში მომხდარი საზარელი მკვლელობის ისტორია. ტრაგიკულმა ფაქტმა დიდი გამოხმაურება ჰპოვა გერმანულ საზოგადოებაში.
გთავაზობთ პუბლიკაციას მცირე შემოკლებით:
მანჰეიმის პროკურატურამ, ჩატარებული გამოძიების საფუძველზე, ბრალდება წაუყენა გერმანელ ცოლ-ქმარს – 44 წლის ქალს და 43 წლის მამაკაცს – ორი უკრაინელი ქალის ერთობლივად მოკვლისა და ბავშვის გატაცების თაობაზე, რომელიც ბადენ-ვიურტემბერგის მხარეში მოხდა. დანაშაულის მიზეზი, როგორც ცნობილი ხდება, იყო ცოლ-ქმრის განუხორციელებელი სურვილი – ჰყოლოდათ შვილი, გოგონა, რომლის შემდეგ მათ, „არაუგვიანეს 2023 წლის მარტისა“, ჩაიფიქრეს და მოამზადეს გეგმა „მოეტაცებინათ ახალშობილი მდედრობითი სქესის ბავშვი, რომელსაც თავისად გაასაღებდნენ“.
დანაშაულის ისტორია: დააძინეს, მოკლეს და დაწვეს
როგორც პროკურატურაში აცხადებენ, ორმა ბრალდებულმა, ახალდაბადებული ბავშვის გატაცების მიზნით, ორი უკრაინელი ლტოლვილი მოკლა – 51 წლის ქალი და მისი 27 წლის ქალიშვილი, რომელიც რამდენიმე დღის ნამშობიარევი იყო. “ბავშვის გასატაცებლად მეტი შანსები რომ ჰქონოდათ, 44 წლის ქალი უკრაინელი ლტოლვილების მხარდამჭერი ჯგუფის წევრი გახდა და Telegram-არხის მეშვეობით, 2024 წლის იანვრის ბოლოს, დაუკავშირდა 27 წლის მსხვერპლს, როცა იგი თარჯიმანს ეძებდა გოგონას დაბადების წინ“, – ნათქვამია პროკურატურის მიერ გავრცელებულ ცნობაში.
პროკურატურის საბრალდებო დასკვნაში აღნიშნულია, რომ ბრალდებულებმა 27 წლის ქალიშვილისა და დედამისის მკვლელობა ბავშვის დაბადებიდან ერთ კვირაში განახორციელეს. “2024 წლის 6 მარტს, ცოლ-ქმარმა უკრაინელები რესტორანში მიიპატიჟეს და ორივე ქალს ჩუმად დამამშვიდებელი პრეპარატი ჩაუყარეს. როცა ორივე უკრაინელმა თავი ცუდად იგრძნო, ცოლ-ქმარმა თვალთმაქცურად განაცხადეს, რომ ისინი საავადმყოფოში უნდა წაეყვანათ, ჩასვეს ავტომანქანაში და გულწასული ქალები ბად-შენბორნის ტბის ნაპირზე მიიყვანეს, 51 წლის ქალი იქვე მოკლეს, გვამი დაწვეს, მისი 27 წლის ქალიშვილი, რეინის ახლოს, ხოკენჰაიმის ტბასთან მიიყვანეს და ისიც მოკლეს, ჩვილი გოგონა კი სახლში წაიყვანეს. ამჟამად ბრალდებულებს წარდგენილი აქვთ ოფიციალური ბრალდება ორი პუნქტით – ერთობლივად ჩადენილი მკვლელობისა და არასრულწლოვანის გატაცებისათვის.
ვინ არიან მსხვერპლნი?
მოკლულები დედა-შვილი მარინა და მარგარიტა სტეცენკოები არიან. ძებნის ოპერაცია მაშინ დაიწყო, როცა პოლიციამ 7 მარტს, მდინარე რეინთან ახლოს, 27 წლის მარგარიტა სტეცენკოს გვამი იპოვა. დაიწყეს ახალშობილის ძებნაც. 51 წლის მარინა სტეცენკოს ნახევრად დამწვარი გვამი კი ორკვირიანი ძებნის შემდეგ, 20 მარტს აღმოაჩინეს.
დედა, ბებია და შვილიშვილი რეინ-ნეკარის ოკრუგში, ლტოლვილთა განთავსების ცენტრში ცხოვრობდნენ მას შემდეგ, რაც ისინი გერმანიაში უკრაინიდან ჩავიდნენ, ომის გამო. პოლიციამ ცოლ-ქმარი 13 მარტს დააკავა, ახალშობილი გოგონა, საბედნიეროდ, უვნებელი აღმოჩნდა.
მოამზადა სიმონ კილაძემ
