“მათ გონებაში იხარშება ისე, რომ მართლმადიდებლობა დემოკრატიის მუხრუჭია” – ირაკლი ზარქუა რადიკალურ ოპოზიციაზე

პატრიარქი ბრძენია და სამართლიანი. მან ყველაზე კარგად უწყის, თუ რისი დამსახურებაა, რომ ქართველმა ერმა და ქართულმა სახელმწიფომ ხელისუფლების ძალისხმევითა და დახმარებით შედეგი დავდეთ, – ამის შესახებ პარლამენტის რეგიონული პოლიტიკისა და თვითმმართველობის კომიტეტის თავმჯდომარის პირველმა მოადგილემ, ირაკლი ზარქუამ განაცხადა.

მისი თქმით, რადიკალური ოპოზიციის გონებაში იხარშება ისე, რომ მართლმადიდებლობა ეს არის დემოკრატიის მუხრუჭი.

„ამ მავნებლებმა და ე.წ. რადიკალებმა ერთმანეთის „ჩაშვება“ დაიწყეს. მათ გონებაში იხარშება ისე, რომ მართლმადიდებლობა ეს არის დემოკრატიის მუხრუჭი. საპატრიარქო ქადაგებს კეთილშობილებას, სიყვარულს, გვერდში დგომას, გაძლიერებას, მართლმადიდებლობას, ეროვნულ ტრადიციებს. ბუნებრივია, მათ ეს არ მოსწონთ და ამიტომ უპირისპირდებიან“, – აღნიშნა ირაკლი ზარქუამ.

სრულიად საქართველოს კათოლიკოს-პატრიარქი, ილია მეორე ევროკომისიის გუშინდელ გადაწყვეტილებას გამოეხმაურა: „ეს გადაწყვეტილება არის ჩვენი ხალხისა და ხელისუფლების ძალისხმევით მიღწეული შედეგი და ყველას ვულოცავთ ამ წარმატებას“. ევროკომისიის გადაწყევტილებაზე პატრიარქის გამოხმაურებას პოლიტიკურ სპექტრში აფასებენ. ოპოზცია ილია მეორის გზავნილს არ იზიარებს, განსაკუთრებით იმ ნაწილში, სადაც ხელისუფლების დამსახურებაზე საუბარია.