“ISFED-ი ასოცირებულია თაღლითურ ორგანიზაციასთან” -კახა კალაძე
ISFED-ი ასოცირებულია თაღლითურ ორგანიზაციასთან. ეს არ არის უბრალოდ ჩემი სიტყვები, ეს დადასტურებული ფაქტებია, – ასე ეხმაურება თბილისის მერი კახა კალაძე ამერიკის შეერთებული შტატების საელჩოს განცხადებას, რომლის თანახმადაც, „სამართლიანი არჩევნების” (ISFED), საქართველოს ერთ-ერთი ყველაზე სანდო და გამოცდილი საარჩევნო სადამკვირვებლო ორგანიზაციის არდაშვება საარჩევნო რეფორმების პარლამენტის სამუშაო ჯგუფში პირდაპირ ეწინააღმდეგება ევროკომისიის რეკომენდაციას.
„მე არ მინახავს ამერიკის შეერთებული შტატების საელჩოს განცხადება, არ მომისმენია და არ ვარ დარწმუნებული, რომ ამერიკის საელჩო ამ განცხადებას გააკეთებდა. ISFED-ი ასოცირებულია თაღლითურ ორგანიზაციასთან. ეს არ არის უბრალოდ ჩემი სიტყვები, ეს დადასტურებული ფაქტებია. ეს ორგანიზაცია დაკავებული იყო არჩევნების შედეგების გაყალბებით. მეორადი დათვლის შედეგებისას, რომელსაც ისინი აკეთებდნენ, საზოგადოებას არასწორი ინფორმაცია მიაწოდეს; მიზანმიმართული მცდელობა იყო საზოგადოების შეცდომაში შეყვანის. ყველაზე რბილად რომ ვთქვათ და შევაფასოთ მათი ეს ქმედება, ეს იყო თაღლითობა. რა თქმა უნდა, ამას უნდა მოჰყოლოდა ჩაღრმავება, კიდევ უფრო დეტალებში ჩასვლა, აღძრულიყო სისხლის სამართლის საქმე და პასუხი უნდა მოეთხოვათ ყველასთვის. მხოლოდ ხელმძღვანელის გადადგომით შემოიფარგლა ამ საქმის ჩახურვა რაც არ მიმაჩნია სწორად. დღესაც არ არის გვიან. ამას სჭირდება დეტალებში შესვლა. ეს პირდაპირ მიუთითებს იმაზე, რომ ეს იყო იმ რევოლუციური სცენარის ნაწილი, რომელსაც ამზადებდა ოპოზიცია“, – განაცხადა კალაძემ და დასძინა, რომ აბსოლუტურად სწორი გადაწყვეტილებაა ის, რომ არ მოხდება ამ ორგანიზაციის ჩართვა პარლამენტის სამუშაო ჯგუფებში.
რაც შეეხება კითხვას, რამდენად ექნება ნდობა პარლამენტში შექმნილი სამუშაო ჯგუფების საქმიანობას არასამთავრობო სექტორის მონაწილეობის გარეშე, კალაძემ აღნიშნა ის ორგანიზაციები, რომლებიც პროცესში მონაწილეობის სურვილს გამოთქვამდნენ, არ არიან არასამთავრობო ორგანიზაციები – „ისინი არიან ჩვეულებრივი პოლიტიკური აქტორები, პოლიტიკური მოთამაშეები“.
„ის პუნქტები, რაც იყო მოცემული იმისთვის, რომ შევასრულოთ ვალდებულებები, ამაზე არაერთხელ გაკეთდა განცხადება. კიდევ ერთხელ გავიმეორებ, რომ ვიღებთ პასუხისმგებლობას და მნიშვნელოვანი ვალდებულებებია, რომელიც აუცილებლად შესრულდება ისევე, როგორც შესრულდა ასოცირების ხელშეკრულების ვალდებულებები. დათქმა, რაც იყო, ყველაფერი იქნება იდეალურად შესრულებული ჩვენი მხრიდან. რაც შეეხება არასამთავრობო ორგანიზაციებს, უბრალოდ დააკვირდით, ხალხი ხომ ყველაფერს ხედავს? ყველა ინფორმაცია ხელმისაწვდომია, დავაკვირდეთ არასამთავრობო ორგანიზაციების წარმომადგენლების, ხელმძღვანელების განცხადებებს, ისინი არიან ჩვეულებრივი პოლიტიკური აქტორები, პოლიტიკური მოთამაშეები. შინაარსობრივად რაც არის არასამთავრობო ორგანიზაცია, არანაირი კავშირი არა აქვთ მასთან. ისინი არიან ჩვეულებრივი ოპოზიციური სპექტრის წარმომადგენლები“, – განაცხადა კალაძემ.
საქართველოში ამერიკის შეერთებული შტატების საელჩომ განცხადება არასამთავრობო ორგანიზაცია „სამართლიან არჩევნებთან” (ISFED) დაკავშირებით რამდენიმე დღის წინ გაავრცელა, სადაც აღნიშნულია, რომ ISFED საქართველოს ერთ-ერთი ყველაზე სანდო და გამოცდილი საარჩევნო სადამკვირვებლო ორგანიზაციის არდაშვება საარჩევნო რეფორმების პარლამენტის სამუშაო ჯგუფში პირდაპირ ეწინააღმდეგება ევროკომისიის რეკომენდაციას, რომლის თანახმად საქართველომ უნდა „უზრუნველყოს სამოქალაქო საზოგადოების ჩართულობა გადაწყვეტილების მიღების პროცესის ყველა დონეზე. როგორც საელჩოში აღნიშნავენ, „სამოქალაქო საზოგადოების ორგანიზაციები რიგ საკითხებზე ხალხის ხმას წარმოადგენს და სასიცოცხლო როლს თამაშობს მოქალაქეთა საჭიროებების, პრიორიტეტებისა და არჩევანის უზრუნველსაყოფად. ISFED-ის არდაშვება პარლამენტის საარჩევნო რეფორმის პროცესის გულწრფელობასთან დაკავშირებით კითხვებს ბადებს.
