„ევროკავშირის ქვეყნების მოქალაქეები შიშობენ, რომ მათი უსაფრთხოების დონე შესუსტდება“ – უცხოური პრესა
ბრიტანულ გაზეთ „თაიმსში“ (The Times) გამოქვეყნებულია სტატია სათაურით „ევროკავშირის ქვეყნების მოქალაქეები შიშობენ, რომ უკრაინის სავარაუდო წევრობასთან დაკავშირებით, მათ უსაფრთხოების დონე შესუსტდება“ (ავტორი – ბრუნო უოტერფილდი), რომელშიც განხილულია საკითხი უკრაინის ევროკავშირში გაწევრიანების პერსპექტივის შესახებ.
გთავაზობთ პუბლიკაციის შინაარსს:
უკრაინის ევროკავშირში სავარაუდო გაწევრიანების საკითხი ბლოკის ქვეყნების მოქალაქეებში ღრმა განხეთქილებას იწვევს. ბევრი მათგანი შეშფოთებულია იმით, რომ თუ უკრაინა ევროკავშირში გაწევრიანდება, ამით რუსეთს მეტი საბაბი ექნება ევროპა დააზარალოს.
უკრაინის საკითხი ყველაზე მეტ სკეპტიციზმს და ანტიპათიას იწვევს ევროკავშირის საკვანძო ქვეყნების მოსახლეობაში – გერმანიაში, საფრანგეტსა და ავსტრიაში, – ეს დასტურდება ბერლინის ანალიტიკური ცენტრის (ECFR) მიერ ჩატარებული გამოკითხვის შედეგებით.
კვლევის თანახმად, უკრაინის ევროკავშირში მიღებას ეთანხმება მხოლოდ ყოველი მეოთხე ფრანგი, ხოლო ავსტრიელთა ნახევარი (52%) მიღების კატეგორიული წინააღმდეგია. გერმანელების 39% სკეპტიკურად არის განწყობილი უკრაინის ევროპული პერსპექტივის მიმართ.
მთლიანობაში გამოკითხვის ბევრი მონაწილე თვლის, რომ უკრაინის მიღების საკითხში აჩქარებამ შეიძლება თვით ევროპა დააზარალოს. ამ თვალსაზრისს იზიარებს რესპოდენტთა 45% ავსტრიაში, დანიაში, საფრანგეთში, გერმანიაში, პოლონეთსა და რუმინეთში.
გამოკითხულებიდან ყოველი მეოთხე მონაწილე თვლის, რომ უკრაინისადმი გაწეული ევროპული მხარდაჭერა რუსეთისათვის გაგზავნილი „ძლიერი სიგნალი“ იქნება. ამასთან, გერმანელთა და ავსტრიელთა უმეტესობა (შესაბამისად, 51% და 63%) მიიჩნევს, რომ უკრაინის ევროკავშირში მიღებით მათი უსაფრთხოება შესუსტდება.
„ბრიუსელის გეოპოლიტიკური რიტორიკა ნიღბავს ევროკავშირის წევრი ქვეყნების მოქალაქეთა ღრმა შეშფოთებას და სკეპტიციზმს იმ პოტენციური არასასიამოვნო შედეგების გათვალსიწინებით, რაც ორგანიზაციის გაფართოება გამოიწვევს – კონკრეტულად, უკრაინის მიღებით“, – აცხადებს პეტრ ბურასი, ბერლინის ანალიტიკური ცენტრის წარმომადგენელი. მისი თქმით, ევროკავშირის ლიდერებმა ზუსტი ვადები უნდა დააწესონ ახალი წევრების მისაღებად, რომ საზოგადოებაში ყველაფერი გარკვეული იყოს. შესაბამისად, უფრო მკაფიო გახდება ინსტიტუციური რეფორმების განხორციელების დრო, საზოგადოება უფრო მეტად დაინტერესდება საკითხით, ბევრ ნიუანსში გაერკვევა და შედარებით ნაკლებს შეშფოთებას გამოავლენს“.
