ჩვენმა გადაწყვეტილებებმა შეასრულა გადამწყვეტი როლი იმაში, რომ საქართველო არ აღმოჩნდა მეორე ფრონტი – პრემიერი

ჩვენმა გადაწყვეტილებებმა შეასრულა გადამწყვეტი როლი იმაში, რომ საქართველო არ აღმოჩნდა მეორე ფრონტი. მათ შორის, პრინციპული იყო გადაწყვეტილება, რომელიც უკავშირდებოდა სანქციების არდაწესებას, – ასე უპასუხა პრემიერ-მინისტრმა, ირაკლი კობახიძემ ჟურნალისტების შეკითხვას, რომელიც ყოფილი პრემიერ-მინისტრის, ირაკლი ღარიბაშვილის 3 წლის წინანდელი განცხადების შეფასებას შეეხებოდა, სადაც ღარიბაშვილმა აღნიშნა, რომ საქართველო რუსეთის წინააღმდეგ დაწესებულ სანქციებს არ შეუერთდებოდა.

როგორც კობახიძემ აღნიშნა, მაშინ იყო პირდაპირი მცდელობა იმისა, რომ საქართველო სამხედრო კონფლიქტში ჩაერთოთ.

„ყველას გვახსოვს ირაკლი ღარიბაშვილის სამი წლის წინანდელი განცხადება. ეს იყო ისტორიული გადაწყვეტილება და განცხადება, რომელიც გაახმოვანა ირაკლი ღარიბაშვილმა. მაშინ იყო პირდაპირი მცდელობა იმისა, რომ საქართველოში ესკალაცია მომხდარიყო, საქართველო სამხედრო კონფლიქტში ჩაერთოთ, რომელიც უკრაინაში დაიწყო. ჩვენმა გადაწყვეტილებებმა შეასრულა გადამწყვეტი როლი იმაში, რომ საქართველო არ აღმოჩნდა მეორე ფრონტი. მათ შორის, პრინციპული იყო გადაწყვეტილება, რომელიც უკავშირდებოდა სანქციების არ დაწესებას. ეს ერთის მხრივ ნიშნავდა ესკალაციას, რომელიც ჩვენი ქვეყნის არაკეთილმოსურნეებს უნდოდათ, მეორეს მხრივ, ეს ნიშნავდა ჩვენი ქვეყნის ეკონომიკის ჩამოშლას. რა თქმა უნდა, ამ ნაბიჯს ვერ გადავდგამდით. მაშინ იქნა პრინციპული გადაწყვეტილება მიღებული, რომელიც ირაკლი ღარიბაშვილმა გაახმოვანა. ამის შემდეგ შევძელით ჩვენი მტკიცე პოზიციის შენარჩუნება, რომელიც უკავშირდებოდა საქართველოში მშვიდობის განმტკიცებას“,- განაცხადა ირაკლი კობახიძემ.

ცნობისთვის, რუსეთ-უკრაინის ომის დაწყების შემდეგ, 2022 წლის 25 თებერვალს, მაშინდელმა პრემიერ-მინისტრმა, ირაკლი ღარიბაშვილმა განაცხადა, რომ რუსეთის წინააღმდეგ დაწესებულ ეკონომიკურ და სხვა სახის სანქციებს საქართველო არ შეუერთდებოდა. ირაკლი ღარიბაშვილმა მიღებული გადაწყვეტილება „ეროვნული და ხალხის ეროვნული ინტერესებით“ ახსნა.